റിയാദ്: രാജ്യത്തെ ഷോപ്പിങ് മാളുകളിലെ മുഴുവന്‍ ജോലികള്‍ കൂടി സ്വദേശിവത്കരിക്കുന്നു. മുഴുവന്‍ ജോലികളും സഊദികള്‍ക്ക് മാത്രമായി പരിമിതപ്പെടുത്താന്‍ തൊഴില്‍മന്ത്രി അലി അല്‍ഖഫീസ് നിയമ നിര്‍മാണം നടത്തിയെന്ന് മന്ത്രാലയ വക്താവ് അറിയിച്ചു.

എന്നാല്‍ സ്വദേശിവല്‍ക്കരണം എന്നു മുതല്‍ നടപ്പാക്കുമെന്ന് വ്യക്തമാക്കിയിട്ടില്ല. ട്വിറ്ററിലൂടെയാണ് പുതിയ തീരുമാനം അധികൃതര്‍ പുറത്തുവിട്ടത്.  എന്നാല്‍ ഏതൊക്കെ തരത്തിലായിരിക്കും സഊദിവല്‍ക്കരണം നടപ്പാക്കുകയെന്നോ എങ്ങിനെയാകും ഇത് പ്രാബല്യത്തില്‍ വരുത്തുകയെന്നോ തുടങ്ങിയ കാര്യങ്ങള്‍ പുറത്തു വന്നിട്ടില്ല.

സഊദി വിഷന്‍ 2030 സാമ്പത്തിക പദ്ധതിയനുസരിച്ചു രാജ്യത്തെ വിവിധ മേഖലകള്‍ സഊദി വല്‍ക്കരിക്കുന്നതിനുള്ള നടപടികള്‍ ത്വരിതഗതിയില്‍ നടന്നു വരികയാണ്. വിഷന്‍ 2030 നു മുന്നോടിയായി 2020 ഓടെ ഒരു മില്ലിന്‍ തൊഴിലുകള്‍ സഊദികള്‍ക്കായി നല്‍കാനുള്ള പദ്ധതികളാണ് സഊദി തൊഴില്‍ സാമൂഹിക മന്ത്രാലയം നടപ്പിലാക്കുന്നത്.