കോഴിക്കോട്: ജില്ലയില്‍ രോഗപ്രതിരോധ കുത്തിവയ്പ്പ് നടത്താത്ത അഞ്ച് വയസിന് താഴെ പ്രായമുള്ള എല്ലാ കുട്ടികള്‍ക്കും പ്രതിരോധ കുത്തിവയ്പ്പ് ലഭ്യമാക്കുന്നതിനായി മിഷന്‍ ഇന്ദ്രധനുഷ് നാലാം ഘട്ടം വിപുലമായി നടപ്പിലാക്കാന്‍ തീരുമാനിച്ചു.പരിപാടിയുടെ അടുത്ത ഘട്ടം മെയ് 7ന് ആരംഭിക്കും. ഇതിനായി ഡെപ്യൂട്ടി കലക്ടര്‍ പി. അബ്ദുല്‍ നാസറിന്റെ അധ്യക്ഷതയില്‍ ദ്രുതകര്‍മ സേന രൂപീകരിച്ചു.
തുടര്‍ച്ചയായി മൂന്ന് മാസങ്ങളില്‍ 7ാം തിയതി മുതല്‍ ഏഴു ദിവസങ്ങളിലായാണ് പദ്ധതി നടപ്പിലാക്കുന്നത്. ഈ ദിവസങ്ങളില്‍ പ്രത്യേക പ്രതിരോധ കുത്തിവയ്പ്പ് ക്യാംപുകള്‍ പ്രാഥമികാരോഗ്യ കേന്ദ്രത്തിന്റെ നേതൃത്വത്തില്‍ പഞ്ചായത്ത് തലത്തില്‍ സംഘടിപ്പിക്കും. ഇതുവരെ പ്രതിരോധ കുത്തിവയ്പ്പ് എടുക്കാത്ത കുട്ടികള്‍, ഒരു മാസത്തോളം കുത്തിവയ്പ്പ് എടുക്കാന്‍ വൈകിയ കുട്ടികള്‍ എന്നിവരെ കണ്ടെത്തി ദേശീയ രോഗ പ്രതിരോധ കുത്തിവയ്പ്പ് പട്ടിക പ്രകാരം ലഭിക്കേണ്ട വാക്‌സിനുകള്‍ ലഭ്യമാക്കുകയാണ് പദ്ധതിയുടെ ലക്ഷ്യം.
ആരോഗ്യ പ്രവര്‍ത്തകര്‍, ആശാ പ്രവര്‍ത്തകര്‍, അങ്കണവാടി പ്രവര്‍ത്തകര്‍ എന്നിവര്‍ അതതു പ്രദേശത്തെ ഇത്തരം കുട്ടികളെ കണ്ടെത്തി പഞ്ചായത്ത്തലത്തില്‍ ആക്ഷന്‍പ്ലാന്‍ തയാറാക്കും. ഇതിന്റെ അടിസ്ഥാനത്തില്‍ അങ്കണവാടികള്‍, പ്രാഥമികാരോഗ്യ കേന്ദ്രങ്ങള്‍ എന്നിവിടങ്ങളില്‍ കുട്ടികളെ എത്തിച്ച് പ്രതിരോധ കുത്തിവയ്പ്പ് ലഭ്യമാക്കും.തദ്ദേശ സ്വയംഭരണ സ്ഥാപനങ്ങളുടേയും ജനപ്രതിനിധികളുടെയും നേതൃത്വത്തിലാണ് പരിപാടി പഞ്ചായത്ത് തലത്തില്‍ നടപ്പിലാക്കുന്നത്.
ജില്ലാ മെഡിക്കല്‍ ഓഫിസര്‍ ഇന്‍ ചാര്‍ജ് ഡോ.ആശാദേവി, കോര്‍പറേഷന്‍ ഹെല്‍ത്ത് ഓഫിസര്‍ ഡോ.ഗോപകുമാര്‍, ഐ.എ.പി പ്രതിനിധി ഡോ. കൃഷ്ണകുമാര്‍, ആര്‍.സി.എച്ച് ഓഫിസര്‍ ഡോ. സരളാ നായര്‍, ഡെപ്യൂട്ടി ഡി.എം.ഒ ഡോ. ജീജ യോഗത്തില്‍ പങ്കെടുത്തു.