മലപ്പുറം: കോഴിക്കോട് സാമൂതിരിയുടെ പൈതൃക തലസ്ഥാനമായി പതിമൂന്നാം നൂറ്റാണ്ടിലെ കേരള ചരിത്രത്തില്‍ പരാമര്‍ശിക്കപ്പെട്ട സ്വയം ഭരണാവകാശങ്ങളോടു കൂടിയ നെടിയിരുപ്പ് സ്വരൂപത്തില്‍ കോഴിക്കോട് സാമൂതിരിയുടെ സ്മാരകമായി ദേശീയ പൈതൃക മ്യൂസിയവും ഗവേഷണ കേന്ദ്രവും ഉള്‍ക്കൊള്ളുന്ന നാഷണല്‍ ഹെറിറ്റേജ് ടൂറിസം പാര്‍ക്ക് നിലവില്‍ വരുന്നു. കരിപ്പൂര്‍ നെടിയിരുപ്പ് മിനി ഊട്ടിയിലെ തിരുവോണം മലയുടെ താഴ്‌വരയിലാണു 10 ഏക്കര്‍ വിസ്തൃതിയില്‍ ദേശീയ ഹെറിറ്റേജ് ടൂറിസം പാര്‍ക്ക് നിലവില്‍ വരുന്നത്. നെടിയിരുപ്പു സ്വരൂപം നാഷണല്‍ ഹെറിറ്റേജ് അക്കാദമി എന്നാണ് നാമകരണം ചെയ്തിട്ടുള്ളത്. ഡല്‍ഹിയിലെ ഗ്രീന്‍ എര്‍ത്ത് കണ്‍സള്‍ട്ടന്‍സിയാണ് ഹെറിറ്റേജ് പാര്‍ക്ക് നിര്‍മ്മിക്കുന്നത്.
ചേരമാന്‍ പെരുമാളിന്റെ നാമധേയത്തിലുള്ള ഹെറിറ്റേജ് ഗേറ്റും സാമൂതിരിയുടെ നാമധേയത്തിലുള്ള മാനാഞ്ചിറ മാതൃകയിലുള്ള വിശാലമായ കുളവും അന്താരാഷ്ട്ര നിലവാരത്തിലുള്ള ആര്‍ട്ട് ഗാലറിയും സജ്ജീകരിക്കുന്നതിനോടൊപ്പം തന്നെ വിദേശ രാജ്യങ്ങളില്‍ നിന്നെത്തുന്ന ചരിത്ര ഗവേഷകര്‍ക്കും വിനോദ സഞ്ചാരികള്‍ക്കും താസമിക്കാനുതകുന്ന ടൂറിസ്റ്റ് ഗസ്റ്റ് ഹൗസുകളും ഹെറിറ്റേജ് വില്ലകളും ഹെറിറ്റേജ് അക്കാദമിയില്‍ സജ്ജീകരിക്കുന്നുണ്ട്. ദേശീയ ഫോക്ക്‌ലോര്‍ മ്യൂസിയവും റഫറന്‍സ് ലൈബ്രറിയും സ്ഥാപിക്കുന്നുണ്ട്. ആര്‍ക്കിടെക്റ്റ് ആര്‍.കെ രമേശാണ് നെടിയിരുപ്പ് ഹെറിറ്റേജ് ഫൗണ്ടേഷന്റെ ഡയറക്ടര്‍.
പാര്‍ക്കിന്റെ തറക്കല്ലിടല്‍ കര്‍മ്മം കോഴിക്കോട് സാമൂതിരി കെ.സി ഉണ്ണി അനുജന്‍ രാജ നിര്‍വഹിക്കും.
ടി.വി ഇബ്രാഹീം എംഎല്‍എ, മുനിസിപ്പല്‍ ചെയര്‍മാന്‍ സി.കെ നാടിക്കുട്ടി, കാലിക്കറ്റ് എയര്‍പോര്‍ട്ട് ഡയറക്ടര്‍ കെ.ജനാര്‍ദനന്‍, കാലിക്കറ്റ് സര്‍വകലാശാല വൈസ് ചാന്‍സലര്‍ ഡോ. കെ. മുഹമ്മദ് ബഷീര്‍ പങ്കെടുക്കും.