കാസര്‍കോട്: ലോക്‌സഭ തിരഞ്ഞെടുപ്പിന്റെ ഭാഗമായി കാസര്‍കോട് എക്‌സൈസ് ഇന്റലിജന്‍സ് ആന്‍ഡ് ഇന്‍വെസ്റ്റിഗേഷന്‍ ബ്യൂറോ നടത്തിയ റെയ്ഡില്‍ വീട്ടുവളപ്പില്‍ കുഴിച്ചിട്ട നിലയില്‍ 280കുപ്പി വിദേശ മദ്യവും വില്‍പനക്കാരനില്‍ നിന്നും 161 ടെട്രാ പാക്കറ്റ് മദ്യവും പിടികൂടി.
എക്‌സൈസ് കമ്മിഷണറുടെ നിര്‍ദേശത്തെ തുടര്‍ന്നാണ് റെയ്ഡ്. ബേക്കല്‍ രാമഗുരു മന്ദിരത്തിന് സമീപത്തെ പുഷ്പയുടെ വീട്ടുവളപ്പില്‍ നിന്നാണ് കുഴിച്ചിട്ട നിലയില്‍ 180 മില്ലിയുടെ 280 കുപ്പി കര്‍ണാടക മദ്യം പിടികൂടിയത്. ഹൊസ്ദുര്‍ഗ് റെയ്ഞ്ച് പ്രിവന്റീവ് ഓഫിസര്‍ സി.കെ അഷ്‌റഫ്, ഇ.കെ ബിജോ, ഷെയ്ഖ് അബ്ദുല്‍ ബഷീര്‍, സിവില്‍ എക്‌സൈസ് ഓഫിസര്‍മാരായ ജിതിന്‍, ഡ്രൈവര്‍ മൈക്കിള്‍ എന്നിവരുടെ നേതൃത്വത്തിലായിരുന്നു റെയ്ഡ്. സംഭവവുമായി ബന്ധപ്പെട്ട് എക്‌സൈസ് കേസെടുത്ത് അന്വേഷണം തുടങ്ങി. കാസര്‍കോട് നുള്ളിപ്പാടിയിലെ ബിജു എന്ന ബിജു പൂജാരിയുടെ (48) പക്കല്‍ നിന്നും 180 മില്ലിയുടെ 161 ടെട്രാ പാക്കറ്റ് കര്‍ണാടക നിര്‍മിത വിദേശ മദ്യമാണ് പിടികൂടിയത്.  കാസര്‍കോട് സ്‌പെഷ്യല്‍ സ്‌ക്വാഡ് ഇന്‍സ്‌പെക്ടര്‍ ടോണി ഐസക്, പ്രിവന്റീവ് ഓഫിസര്‍ അശോകന്‍ പരിയാരം, സി.ഇ.ഒമാരായ നൗഷാദ്, ദിനൂപ്, മോഹന കുമാര്‍ എന്നിവരാണ് മദ്യം പിടിച്ചെടുത്തത്.