റിയാദ്: റിയാദിൽ നിന്നും കെ.എം.സി.സിയുടെ മറ്റൊരു വിമാനം കൂടി കൊച്ചിയിലെത്തി.  റിയാദ് കെ.എം.സി.സി സെൻട്രൽ കമ്മിറ്റി ചാർട്ടർ ചെയ്ത ഇൻഡിഗോ എയർലൈൻസ് വിമാനത്തിൽ 171 യാത്രക്കാരാണ്‌  വെള്ളിയാഴ്ച നെടുമ്പാശ്ശേരി വിമാനത്താവളത്തിലിറങ്ങിയത്. റിയാദിൽ നിന്നും ഉച്ചക്ക് രണ്ട് മണിയോടെയാണ്‌ വിമാനം പറന്നുയർന്നത്.  റിയാദിൽ നിന്നുള്ള കെ.എം.സി.സിയുടെ നാലാമത്തെ വിമാനമാണിത്.  

യാത്രക്കാരിൽ 23 പേർ ഗർഭിണികളും 29 പേർ രോഗികളും 3 പേർ കുട്ടികളുമാണ്‌.  രോഗികളിൽ രണ്ട് പേർ വീൽ ചെയറിലാണ്‌ യാത്ര ചെയ്തത്.  പതിവ് പോലെ യാത്രക്കാർക്കെല്ലാം സുരക്ഷാ ഉപകരണങ്ങളും സ്നാക്സും അടങ്ങുന്ന പ്രത്യേക കിറ്റും നൽകി.  യാത്രക്കാരെ സഹായിക്കുന്നതിനായി സഊദി കെ.എം.സി.സി വർക്കിംഗ് പ്രസിഡണ്ട് അഷ് റഫ് വേങ്ങാട്ടിന്റെ നേതൃത്വത്തിൽ കെ.എം.സി.സിയുടെയും വനിതാ കെ.എം.സി.സിയുടെയും ഭാരവാഹികൾ രാവിലെ തന്നെ വിമാനത്താവളത്തിലെ ത്തിയിരുന്നു. മഹ് മൂദ് കയ്യാർ, കബീർ വൈലത്തൂർ, ഷംസു പെരുമ്പട്ട, നൗഷാദ് ചാക്കീരി, റഫീഖ് മങ്കട, ജാബിർ വാഴമ്പുറം, മുനീർ മക്കാനി, മുത്തു കട്ടുപ്പാറ, മജീദ് പരപ്പനങ്ങാടി, ഖാലിദ്, വനിതാ കെ.എം.സി.സി ഭാരവാഹികളായ റഹ് മത്ത് അശ് റഫ്, ജസീല മൂസ, ഫസ്ന തൃശ്ശൂർ എന്നിവർ സഹായത്തിനായി വിമാനത്താവളത്തിലെത്തി.

ഞായർ, തിങ്കൾ ദിവസങ്ങളിലായി റിയാദിൽ നിന്ന് കെ.എം.സി.സിയുടെ കൂടുതൽ വിമാനങ്ങൾ കേരളത്തിലെ വിവിധ വിമാനത്താവളങ്ങളിലേക്ക് പുറപ്പെടുന്നുണ്ടെന്നും വരും ദിവസങ്ങളിലും ഇനിയും സർവ്വീസുകൾ ഒരുക്കാനുള്ള ശ്രമത്തിലാണെന്നും സെൻട്രൽ കമ്മിറ്റി ഭാരവാഹികൾ അറിയിച്ചു.