കോഴിക്കോട്: അന്താരാഷ്ട്ര കയാക്കിങ് ചാംപ്യന്‍ഷിപ്പിന് പ്രചാരണവുമായി സൈക്കിള്‍ റാലിയും. ടീം മലബാര്‍ റൈഡേര്‍സും ഗ്രീന്‍ കെയര്‍ മിഷനും സംയുക്തമായാണ് കോഴിക്കോട്ടുനിന്ന് വയനാടുവരെ നടത്തുന്ന സൈക്കിള്‍ റാലി സംഘടിപ്പിക്കുന്നത്.
റാലി ജില്ലാ കലക്ടര്‍ യു.വി ജോസ് ഫ്‌ളാഗ് ഓഫ് ചെയ്തു. വിനോദസഞ്ചാര വകുപ്പ്, ജില്ലാ ടൂറിസം പ്രമോഷന്‍ കൗണ്‍സില്‍, ഗ്രീന്‍ കെയര്‍ മിഷന്‍, ടീം മലബാര്‍ റൈഡേഴ്‌സ്, ജി.എം.ഐ എന്നിവ സംയുക്തമായാണ് റാലി നടത്തുന്നത്. സാഹിര്‍ ഉസ്മാന്‍, ബുജൈര്‍, കെ.ടി.എ നാസര്‍, കൃഷ്ണന്‍കുട്ടി എന്നിവരുടെ നേതൃത്വത്തില്‍ നാല്‍പതോളം സൈക്കിളിസ്റ്റുകളാണ് റാലിയില്‍ പങ്കെടുക്കുന്നത്. സിവില്‍ സ്റ്റേഷനില്‍നടന്ന ഫ്‌ളാഗ് ഓഫ് ചടങ്ങില്‍ ടൂറിസം വകുപ്പ് ജോയിന്റ് ഡയരക്ടര്‍ സി.എന്‍ അനിതാ കുമാരി, ഡെപ്യൂട്ടി തഹസില്‍ദാര്‍ ഇ. അനിതാ കുമാരി, ഡി.ടി.പി.സി സെക്രട്ടറി ബിനോയ് വേണുഗോപാല്‍, ജി.എം.ഐ സെക്രട്ടറി റോഷന്‍ കൈനടി പങ്കെടുത്തു. ഇന്ന് രാവിലെ കൈതപ്പൊയില്‍ വഴി തുഷാരഗിരി പാലത്തില്‍ സമാപിക്കുന്ന സൈക്കിള്‍ റാലിക്ക് എം.എല്‍.എ ജോര്‍ജ്ജ് എം തോമസ് സ്വീകരണം നല്‍കും.