കോവളം: പ്ലാസ്റ്റിക് അടക്കമുള്ള മാലിന്യങ്ങള്‍ കടലില്‍ കുന്നുകൂടുന്നത് ഭൂമിയുടെയും മനുഷ്യരാശിയടക്കമുള്ള ജീവജാലങ്ങളുടെയും നിലനില്‍പിന് വലിയ ഭീഷണിയാണെന്നും ഇതിനെതിരേയുള്ള പ്രവര്‍ത്തനങ്ങള്‍ക്കും ബോധവത്കരണത്തിനും പുതിയ തലമുറ മുന്നിട്ടിറങ്ങണമെന്നും എം.വിന്‍സെന്റ് എം.എല്‍.എ. ലോക ഭൗമദിനത്തോടനുബന്ധിച്ച് സമുദ്രത്തെയും സമുദ്രജീവികളെയും മലിനീകരണത്തില്‍ നിന്ന് രക്ഷിക്കുക എന്ന മുദ്രാവാക്യം ഉയര്‍ത്തി ഉദയസമുദ്ര ഗ്രൂപ്പിന്റെ ആഭിമുഖ്യത്തില്‍ കുട്ടികള്‍ക്കും കൌമാരക്കാര്‍ക്കുമായി സംഘടിപ്പിച്ച ബോധവത്കരണ ക്യാംപ് ഉദ്ഘാടനം ചെയ്ത് സംസാരിക്കുകയായിരുന്നു എം.എല്‍.എ.
പ്രകൃതി സംരക്ഷണത്തെ കുറിച്ച്  നടത്തിയ ബോധവത്കരണ ക്ലാസിന് രാജഗോപാല്‍ അയ്യര്‍, അയൂബ്ഖാന്‍ എന്നിവര്‍ നേതൃത്വം നല്‍കി. ശിവശങ്കരപിള്ള അധ്യക്ഷനായി. ബൈജു, സതീശ്, ഗുരുപ്രസാദ്, ജാക്‌സന്‍ പീറ്റര്‍ തുടങ്ങിയവര്‍ പങ്കെടുത്തു. സമുദ്ര സംരക്ഷണത്തെകുറിച്ചുള്ള ഹ്രസ്വ ചിത്രവും കുട്ടികള്‍ക്കായി പ്രദര്‍ശിപ്പിച്ചു.