കയ്പമംഗലം: ബൈക്ക് മോഷ്ടിച്ചകേസില്‍ നാല് വിദ്യാര്‍ഥികളെ മതിലകം പൊലിസ് അറസ്റ്റ് ചെയ്തു. കയ്പമംഗലം സ്വദേശികളായ പത്താംക്ലാസ് കഴിഞ്ഞ മൂന്ന് വിദ്യാര്‍ഥികളും, പ്ലസ്ടു വിദ്യാര്‍ഥിയുമാണ് പിടിയിലായത്.
കയ്പമംഗലം തായ്‌നഗര്‍ സ്വദേശി ഞാറ്റുകെട്ടി അജിത്കുമാറിന്റെ ബൈക്കാണ് മോഷണം പോയത്. തുടര്‍ന്ന് പൊലിസ് നടത്തിയ അന്വേഷണത്തിലാണ് കുട്ടി മോഷ്ടാക്കളായ നാലുപേരും പിടിയിലായത്. ഇവര്‍ കൊടുങ്ങല്ലൂര്‍ പുല്ലൂറ്റ് നിന്നും മറ്റൊരു ബൈക്കും മോഷ്ട്ടിച്ചതായി പൊലിസിനോട് സമ്മതിച്ചിട്ടുണ്ട്.
മോഷ്ടിച്ച ബൈക്ക് ഇവര്‍ കളര്‍ മാറ്റിയും, നമ്പര്‍ മാറ്റി എഴുതിയും ഉപയോഗിച്ച് വരികയായിരുന്നു. പുല്ലൂറ്റ് നിന്നും മോഷ്ടിച്ച ബൈക്ക് കയ്പമംഗലത്തെ ആളൊഴിഞ്ഞ വീട്ടില്‍ മൂടിയിട്ടനിലയില്‍ പൊലിസ് കണ്ടെടുത്തു.
 പ്രതികള്‍ ഈ വീട്ടിലായിരുന്നു തമ്പടിച്ചിരുന്നതെന്നും പൊലിസ് പറഞ്ഞു. ഇവരെ ഇന്നലെ വൈകിട്ട് തൃശൂരിലെ ജുവനൈല്‍ കോടതിയില്‍ ഹാജരാക്കി. മതിലകം എസ്.ഐ സില്‍വര്‍സ്റ്റര്‍, എ.എസ്.ഐ ശ്രീകൃഷ്ണന്‍, സിവില്‍ പൊലിസ് ഓഫിസര്‍മാരായ സന്തോഷ്, ജിജില്‍കുമാര്‍ എന്നിവരടങ്ങുന്ന സംഘമാണ് പ്രതികളെ പിടികൂടിയത്.