പാലക്കാട്: എലപ്പുള്ളിയിലെ മദ്യനിര്‍മ്മാണശാലയ്ക്ക് കൃഷി വകുപ്പിന്റെ എതിര്‍പ്പും. ഭൂമി തരം മാറ്റി നല്‍കാന്‍ കഴിയില്ലെന്ന് ആദ്യം റിപ്പോര്‍ട്ട് സമര്‍പ്പിച്ചത് കൃഷിവകുപ്പ്. ഡാറ്റാ ബാങ്കില്‍ നിന്ന് പദ്ധതിപ്രദേശത്തെ ഒഴിവാക്കണമെന്ന അപേക്ഷ കഴിഞ്ഞവര്‍ഷം ആഗസ്റ്റില്‍ തന്നെ കൃഷിവകുപ്പ് തള്ളിയിരുന്നു. 

എലപ്പുള്ളി പഞ്ചായത്തിലെ ആറാം വാര്‍ഡിലാണ് ഒയാസിസ് മദ്യനിര്‍മ്മാണ കമ്പനി 24 ഏക്കര്‍ സ്ഥലം വാങ്ങിയത്. ഇതില്‍ 4 ഏക്കര്‍ കൃഷിഭൂമിയാണ്. ഇത് തരം മാറ്റാനുള്ള കമ്പനിയുടെ അപേക്ഷയാണ് തള്ളിയത്. 

2008 വരെ ഈ ഭൂമിയില്‍ നെല്‍കൃഷി നടത്തിയിരുന്നുവെന്നും അതുകൊണ്ട് ഭൂമി തരംമാറ്റി നല്‍കാന്‍ കഴിയില്ലെന്നുമാണ് ഇലപ്പുള്ളി കൃഷി ഓഫിസര്‍ റിപ്പോര്‍ട്ട് നല്‍കിയിരിക്കുന്നത്. ഈ റിപ്പോര്‍ട്ടിന്റെ അടിസ്ഥാനത്തിലാണ് തരംമാറ്റാനുള്ള അപേക്ഷ ആര്‍.ഡി.ഒ നിരസിച്ചത്. 

പാലക്കാട് ആര്‍.ഡി.ഒ യുടെ നിര്‍ദേശ പ്രകാരമാണ് എലപ്പുള്ളി കൃഷി ഓഫീസര്‍ പരിശോധന നടത്തുകയും ഇത് ഡാറ്റാ ബാങ്കില്‍ ഉള്‍പ്പട്ടതെന്ന് കണ്ടെത്തുകയും ചെയ്തത്. 

പാലക്കാട് മദ്യനിര്‍മാണശാലയോട് അനുകൂല നിലപാടല്ല കൃഷിവകുപ്പ് കൈകാര്യംചെയ്യുന്ന സി.പി.ഐയ്ക്കുള്ളത്. കൃഷിയേയും കുടിവെള്ള ലഭ്യതയേയും ബാധിക്കുമെന്ന് കാണിച്ച് സി.പി.ഐ പാലക്കാട് ജില്ല എക്‌സ്‌ക്യൂട്ടീവ് പദ്ധതിക്കെതിരെ രൂക്ഷ എതിര്‍പ്പുന്നയിച്ചിരുന്നു.