പാലാക്കാട്: എസ്.എഫ്.ഐ പ്രവര്‍ത്തകന്‍ മഹാരാജാസ് കോളജ് വിദ്യാര്‍ഥി അഭിമന്യൂ വധവുമായി ബന്ധപ്പെട്ട് എസ്.ഡി.പി.ഐ കേന്ദ്രങ്ങളില്‍ റെയ്ഡ് തുടരുന്നു. പാലക്കാട് ജില്ലാ കമ്മിറ്റി ഓഫിസിലാണ് ഇന്ന് റെയ്ഡ് നടത്തിയത്.

പാലക്കാട് നഗരത്തിലെ താരേക്കാട് എസ്.ഡി.പി.ഐ ജില്ലാ കമ്മിറ്റി ഓഫിസില്‍ ഡി.വൈ.എസ്.പി ജി.ഡി വിജയകുമാറിന്റെ നേതൃത്വത്തില്‍ ഇന്‍സ്‌പെക്ടര്‍മാരായ ഹംസ, പ്രേമാന്ദ കൃഷ്ണന്‍ എന്നിവര്‍ ചേര്‍ന്നാണ് റെയ്ഡ് നടത്തിയത്.

ചടനാംകുറുശ്ശിയിലുള്ള എസ്.ഡി.പി.ഐ ഓഫിസില്‍ പാലക്കാട് ടൗണ്‍ സൗത്ത് ഇന്‍സ്‌പെക്ടര്‍ മനോജ് കുമാറിന്റെ നേതൃത്വത്തിലും റെയ്ഡ് നടത്തി. സംഭവമുമായി ബന്ധപ്പെട്ട് ജില്ലയില്‍ ഇതുവരെയായി 300 റെയിഡുകള്‍ നടത്തുകയും അവയില്‍ നിന്നായി നൂറോളം പേരെ അറസ്റ്റ് ചെയ്യുകയും എഴുപതോളം പേരെ കരുതല്‍ തടങ്കലില്‍ പാര്‍പ്പിക്കുകയും ചെയ്തതായി ജില്ലാ പൊലിസ് മേധാവി അറിയിച്ചു.