തിരുവനന്തപുരം: കനത്ത ഭീതിയും പരിഭ്രാന്തിയും വിതച്ച് കൊവിഡിന്റെ സഞ്ചാരം. കഴിഞ്ഞ ദിവസം മരിച്ച രണ്ടുപേര്‍ക്കുകൂടി കൊവിഡ് സ്ഥിരീകരിച്ചു. മലപ്പുറം ജില്ലയിലെ കാളികാവ് സ്വദേശിയായ മുഹമ്മദും(82) എറണാകുളത്തുള്ള 66 കാരന്‍ യൂസഫ് സൈഫുദ്ദീനുമാണ് മരിച്ചത്.
82 കാരനായ മുഹമ്മദ് മഞ്ചേരി മെഡിക്കല്‍ കോളേജിലാണ് മരിച്ചത്.

ഇദ്ദേഹം അര്‍ബുദ രോഗിയായിരുന്നു. സഊദി സന്ദര്‍ശനം കഴിഞ്ഞ് നാട്ടിലെത്തിയതാണ്. യൂസഫ് വിവിധ രോഗങ്ങള്‍ക്ക് ചികിത്സയിലായിരുന്നു. എറണാകുളത്തെ മാര്‍ക്കറ്റില്‍ സ്‌റ്റോര്‍ കീപ്പറായിരുന്നു ഇദ്ദേഹം.
ഓരോ നാളും കണക്കുകള്‍ കുത്തനെ ഉയരുകയാണ്. ഇന്ന് സംസ്ഥാനത്ത് 193 പേര്‍ക്ക് കൊവിഡ് സ്ഥിരീകരിച്ചതായി മുഖ്യമന്ത്രി പിണറായി വിജയന്‍ വാര്‍ത്താ സമ്മേളത്തില്‍ അറിയിച്ചു. അതോടൊപ്പം 167 പേര്‍ക്ക് രോഗ മുക്തിയുണ്ടായത് ആശ്വാസം പകരുന്നതാണ്.
രോഗം ബാധിച്ചവരില്‍ 92 പേര്‍ വിദേശത്തു നിന്നു വന്നവരാണ്. 65 പേര്‍ ഇതര സംസ്ഥാനത്തു നിന്നെത്തിയവരും. സമ്പര്‍ക്കത്തിലൂടെ 35 പേര്‍ക്കു രോഗബാധയുണ്ടായി. സമ്പര്‍ക്കം മൂലമുള്ള രോഗികളുടെ എണ്ണത്തിന്റെ ഏറ്റവും കൂടിയ നിരക്കാണിത്. സമ്പര്‍ക്ക രോഗം ഇരുപത് കടന്നത് കഴിഞ്ഞ ദിവസമാണ്. പിന്നെ താഴേക്കു വന്നിട്ടില്ല.
കൊവിഡ് ബാധിതരുടെ എണ്ണം ഇരുനൂറു കവിഞ്ഞത് ജൂലൈ മൂന്നിനാണ്. അന്ന് 211 പേര്‍ക്കായിരുന്നു രോഗം സ്ഥിരീകരിച്ചത്.
അടുത്ത ദിവസം 240 പേര്‍ക്കായി രോഗം ഉയര്‍ന്നു. കഴിഞ്ഞ ദിവസം 225 പേര്‍ക്കാണ് രോഗം ബാധിച്ചത്. അതില്‍ പിന്നെ ഇന്നുമാത്രമാണ് ഇരുനൂറില്‍താണത്. എന്നാല്‍ ഇതൊരിക്കലും ആശ്വസിക്കാനുള്ള വകയേയല്ല.

24 മണിക്കൂറില്‍ 9927 സാംപിളുകള്‍ പരിശോധിച്ചു. ഇതുവരെ 5622 പേര്‍ക്കാണ് കൊവിഡ് സ്ഥിരീകരിച്ചത്. ചികിത്സയിലുള്ളത് 2252 പേരാണ്. 183291 പേരാണ് നിരീക്ഷണത്തിലുള്ളത്. 2075 ആശുപത്രിയില്‍ നിരീക്ഷണത്തിലാണ്. ഇന്ന് 384 പേരെ ആശുപത്രിയിലേക്ക് മാറ്റി. ഇതുവരെ 204052 സാംപിളുകള്‍ പരിശോധനയ്ക്ക് അയച്ചു. 4179 സാംപിളുകളുടെ ഫലം വരാനുണ്ട്.

ജില്ലാ അതിര്‍ത്തി കടന്നുള്ള നിത്യേനയുള്ള പോക്കുവരവ് ഇനി സമ്മതിക്കില്ലെന്ന് മുഖ്യമന്ത്രി അറിയിച്ചു. മഞ്ചേശ്വരത്ത് നിരവധി പേര്‍ ദിവസവും മംഗലാപുരത്തേക്കും തിരിച്ചും പോയി വരുന്നുണ്ട് ഇതു രോഗവ്യാപനത്തിന് ഇടയാക്കും എന്നതിനാല്‍ ദിവസേനയുള്ള പോക്കുവരവ് പറ്റില്ല. ജോലിയാവശ്യത്തിന് പോകുന്നുവെങ്കില്‍ അവര്‍ മാസത്തില്‍ ഒരു തവണ വരുന്ന രീതിയില്‍ യാത്ര ക്രമീകരിക്കണം. ഐടി മേഖലയില്‍ മിനിമം പ്രവര്‍ത്തനം അനുവദിക്കാന്‍ സാഹചര്യമൊരുക്കും. ട്രിപ്പിള്‍ ലോക്ക് ഡൗണ്‍ മൂലം ടെക്‌നോപാര്‍ക്കിലെ കമ്പനികള്‍ ബുദ്ധിമുട്ടുന്നു അവിടെ മിനിമം ജോലി സൗകര്യം അനുവദിക്കും.

രോഗം സ്ഥിരീകരിച്ചവരുടെ കണക്ക് 

മലപ്പുറം 35
കൊല്ലം 11
ആലപ്പുഴ 15
തൃശ്ശൂര്‍ 14
കണ്ണൂര്‍ 11
എറണാകുളം 25
തിരുവനന്തപുരം 7
പാലക്കാട് 8
കോട്ടയം 6
കോഴിക്കോട് 15
കാസര്‍കോട് 6
പത്തനംതിട്ട 26
ഇടുക്കി 6
വയനാട് 8

രോഗമുക്തരായവരുടെ കണക്ക്

തിരുവനന്തപുരം 7
കൊല്ലം 10
പത്തനംതിട്ട 27
ആലപ്പുഴ 7
കോട്ടയം 11
എറണാകുളം 16
തൃശ്ശൂര്‍ 16
പാലക്കാട് 33
മലപ്പുറം 13
കോഴിക്കോട് 5
കണ്ണൂര്‍ 10
കാസര്‍കോട് 12