സുല്‍ത്താന്‍ ബത്തേരി: 10 കിലോ കഞ്ചാവുമായി രണ്ട് മലപ്പുറം സ്വദേശികള്‍ വയനാട്ടില്‍ പിടിയിലായി. കൂട്ടത്തിലുണ്ടായിരുന്ന രണ്ടുപേര്‍ ഓടി രക്ഷപ്പെട്ടു. ഞായറാഴ്ച രാത്രി ബീനാച്ചി-പനമരം റോഡില്‍ മന്ദംകൊല്ലി ഭാഗത്തു വച്ച് രണ്ടു മാരുതി സ്വിഫ്റ്റ് കാറുകളിലായി കടത്തിക്കൊണ്ടു വന്ന 10 കിലോ കഞ്ചാവാണ് വയനാട് എക്‌സൈസ് സ്‌പെഷല്‍ സ്‌ക്വാഡ്   പിടികൂടിയത്. സംഭവത്തില്‍ മലപ്പുറം ഏറനാട് സ്വദേശികളായ വിവേക്(25), മുഹമ്മദ് ഷിബിലി(23) എന്നിവരെ അറസ്റ്റ് ചെയ്തു. എക്‌സൈസിനെ കണ്ട് ഓടിരക്ഷപ്പെട്ട കോഴിക്കോട് താമരശേരി സ്വദേശി മുഹമ്മദ് ഫവാസ്, അടിവാരം സ്വദേശി പ്യാരി എന്നിവരെ പ്രതി ചേര്‍ത്തും എക്‌സൈസ് കേസെടുത്തിട്ടുണ്ട്. 

കൊവിഡ് പശ്ചാത്തലത്തില്‍ കര്‍ണാടകയില്‍ നിന്നുള്ള ലഹരിക്കടത്ത് കുറഞ്ഞതിനാല്‍ കോഴിക്കോട്, മലപ്പുറം ജില്ലകള്‍ വഴി വയനാട്ടിലേക്ക് കഞ്ചാവ് എത്തുന്നതായി വിവരം ലഭിച്ചതിന്റെ അടിസ്ഥാനത്തില്‍ എക്‌സൈസ് ഷാഡോ സംഘം ആവശ്യക്കാര്‍ എന്ന നിലയില്‍ ഇവരെ  ബന്ധപ്പെടുകയായിരുന്നു. രണ്ട് കിലോ കഞ്ചാവിന് അമ്പതിനായിരം രൂപ വില  ഉറപ്പിക്കുകയും ചെയ്തു. തുടര്‍ന്ന് താമരശേരി, അടിവാരം, കല്‍പ്പറ്റ വഴി ബീനാച്ചിയിലേക്ക് രണ്ട് കാറുകളിലായി എത്തിയ നാലംഗ സംഘത്തെ നാടകീയമായാണ് എക്‌സൈസ് അധികൃതര്‍ കുടുക്കിയത്. വയനാട് എക്‌സൈസ് സ്‌പെഷല്‍ സ്‌ക്വാഡ് സര്‍ക്കിള്‍ ഇന്‍സ്‌പെക്ടര്‍ ജിമ്മി ജോസഫിന്റെ നേതൃത്വത്തിലാണ്  കഞ്ചാവ് പിടികൂടിയത്.