നിലമ്പൂര്‍: വന്യമൃഗശല്യം തടയാന്‍ റെയില്‍പ്പാളങ്ങളുപയോഗിച്ചുള്ള ആസാം മോഡല്‍ വൈദ്യുതവേലി നിര്‍മാണം പ്രായോഗികമാണെങ്കില്‍ കേരളത്തിലും നടപ്പാക്കുമെന്നു വനം മന്ത്രി കെ.രാജു നിയമസഭയില്‍ പി.വി. അന്‍വര്‍ അവതരിപ്പിച്ച സബ്മിഷന് മറുപടി നല്‍കി. നിലമ്പൂര്‍ മേഖലയില്‍ വ്യാപകമായി വന്യമൃഗശല്യം രൂക്ഷമായതിനെത്തുടര്‍ന്നാണ് നിലമ്പൂര്‍ എംഎല്‍എ. നിയമസഭയില്‍ സബ്മിഷന്‍ ഉന്നയിച്ചത്.
മോശപ്പെട്ട പരിപാലനവും നിരീക്ഷണ സംവിധാനങ്ങളുടെ അഭാവവും കാരണം നിലവിലുള്ള വൈദ്യുതി വേലികള്‍ ഫലപ്രദമല്ലെന്നു സബ്മിഷന്‍ അവതരിപ്പിച്ച് പി.വി. അന്‍വര്‍ കുറ്റപ്പെടുത്തി. ബാറ്ററികളും സോളാര്‍ പാനലുകളും അനുബന്ധ ഉപകരണങ്ങളും മോഷണം പോകുന്നതു പതിവാണെന്നും എംഎല്‍എ പറഞ്ഞു.
പ്രശ്‌നത്തിന്റെ ഗൗരവം കണക്കിലെടുത്തു മുഖ്യമന്ത്രിയുടെ നേതൃത്വത്തില്‍ ഉന്നതതല കൂടിയാലോചനാ യോഗം തിരുവനന്തപുരത്തു ചേരും. തുടര്‍ന്നു വനഭൂമിയുള്ള ജില്ലകളിലും പ്രതിരോധമാര്‍ഗങ്ങള്‍ തീരുമാനിക്കാന്‍ ഇത്തരത്തില്‍ ജനപ്രതിനിധികളെയും ഉദ്യോഗസ്ഥരേയും പങ്കെടുപ്പിച്ചു യോഗം കൂടാനും ധാരണയായിട്ടുണ്ടെന്നും മന്ത്രി അറിയിച്ചു.
നോര്‍ത്ത് ഡിവിഷനില്‍ 7.55 കിലോമീറ്ററും സൗത്ത് ഡിവിഷനില്‍ 10 കിലോമീറ്ററും സൗരോര്‍ജ വേലി നിര്‍മ്മിക്കുന്നുണ്ട്. സൗത്തില്‍ 421 മീറ്റര്‍ കരിങ്കല്‍ മതിലും നിര്‍മാണത്തിലാണ്. രണ്ടു ഡിവിഷനിലും 10 വീതം ജീവനക്കാരെ എലഫന്റ് സ്‌ക്വാഡില്‍ നിയോഗിച്ചിട്ടുണ്ടെന്നും മന്ത്രി പറഞ്ഞു.