നെടുമ്പാശ്ശേരി: പാറക്കടവ് ബ്ലോക്ക് പഞ്ചായത്ത് പ്രസിഡന്റ് തിരഞ്ഞെടുപ്പ് 25ന് ബ്ലോക്ക് പഞ്ചായത്ത് കോണ്‍ഫറന്‍സ് ഹാളില്‍ വച്ച് നടക്കും. ഇത് സംബന്ധിച്ച് തിരഞ്ഞെടുപ്പ് കമ്മിഷന്‍ വിജ്ഞാപനം പുറപ്പെടുവിച്ചു.
സഹകരണ സംഘം ജോയിന്റ് രജിസ്ട്രാര്‍ (ജനറല്‍) നെ വരണാധികാരിയായും നിശ്ചയിച്ചിട്ടുണ്ട്. നിലവിലെ പ്രസിഡന്റ് ഷീന സെബാസ്റ്റ്യന്‍ കഴിഞ്ഞ മാസം രാജിവച്ച ഒഴിവിലേക്കാണ് പുതിയ പ്രസിഡന്റിനെ തിരഞ്ഞെടുക്കുന്നത്. ഭരണകക്ഷിയായ കോണ്‍ഗ്രസിലെ ധാരണ പ്രകാരമായിരുന്നു രാജി.
തുടര്‍ന്നുള്ള രണ്ടര വര്‍ഷം കുന്നുകര പഞ്ചായത്തിലെ കുത്തിയതോട് ഡിവിഷനെ പ്രതിനിധീകരിക്കുന്ന ബിന്ദു സെബാസ്റ്റ്യന്‍ പ്രസിഡന്റാകുമെന്നാണ് പ്രതീക്ഷിക്കുന്നത്. 13 അംഗ ബ്ലോക്ക് പഞ്ചായത്തില്‍ കോണ്‍ഗ്രസ് 9, സി.പി.എം 4 എന്നിങ്ങനെയാണ് കക്ഷിനില. 25 ന് രാവിലെ 11 ന് നടക്കുന്ന ഭരണ സമിതി യോഗത്തില്‍ ആകെ അംഗങ്ങളില്‍ പകുതി പേര്‍ (ക്വാറം) ഹാജരായാല്‍ മാത്രമേ തിരഞ്ഞെടുപ്പ് നടപടി ക്രമങ്ങള്‍ ആരംഭിക്കാന്‍ കഴിയുകയുള്ളൂ.
സ്റ്റാന്റിങ് കമ്മിറ്റി ചെയര്‍മാന്‍മാര്‍ക്ക് പ്രസിഡന്റ് സ്ഥാനത്തേക്ക് മത്സരിക്കാന്‍ സ്ഥാനം രാജിവക്കേണ്ടതില്ല. പ്രസിഡന്റ് പദവി വനിതാ സംവരണമാണ്.