റിയാദ്: റസ്‌റ്റോറന്റില്‍ കഴിച്ച ഭക്ഷണത്തെ ചൊല്ലിയുണ്ടായ തര്‍ക്കം കൊലപാതകത്തില്‍ കലാശിച്ചു. തിരുവനന്തപുരം ആലംകോട് കൊച്ചുവിള തെഞ്ചേരിക്കോണം മാജിദാ മന്‍സിലില്‍ പരേതനായ മീരാസാഹിബിന്റെയും ആമിനാ ബീവിയുടെയും മകന്‍ നസീര്‍ (45) ആണ് വെടിയേറ്റു മരിച്ചത്. സഊദിയിലെ റിയാദില്‍ നിന്നും ഏകദേശം 350 കിലോമീറ്റര്‍ ലൈലാ അഫിലാജില്‍ വെള്ളിയാഴ്ച പുലര്‍ച്ചെയാണ് സംഭവം.

ലൈലാ അഫിലാജില്‍ നസീര്‍ നടത്തിവരുന്ന കഫ്തീരിയയില്‍ ഭക്ഷണം കഴിക്കാനെത്തിയ സഊദി സ്വദേശികളായ നാലംഗ സംഘം പണം നല്‍കാതിരുന്നതിനെച്ചൊല്ലിയുണ്ടായ തര്‍ക്കമാണ് കൈയേറ്റത്തിലും കൊലപാതകത്തിലും കലാശിച്ചത്. ഏറെ നേരത്തെ തര്‍ക്കത്തിനൊടുവില്‍, പണം നല്‍കി മടങ്ങിയ സംഘം അര മണിക്കൂറിനകം തോക്കുമായി തിരിച്ചെത്തി നസീറിന് നേരെ വെടിയുതിര്‍ക്കുകയായിരുന്നുവെന്നാണ് വിവരം. സംഭവ സമയത്ത് ഹോട്ടലിലുണ്ടായിരുന്ന ആലംകോട് സ്വദേശികളായ നജീബ്, ഷെമീം, ആസിഫ് എന്നീ ജീവനക്കാര്‍ ഓടി രക്ഷപ്പെടുകയായിരുന്നു.

സംഭവത്തിന്റെ ദൃശ്യങ്ങള്‍ സി.സി ടിവിയില്‍ ദൃശ്യമായിരുന്നതിനാല്‍ ഉടന്‍ തന്നെ നാലു പ്രതികളെയും പൊലിസ് അറസ്റ്റു ചെയ്തതായാണ് വിവരം. 25 വര്‍ഷമായി ഗള്‍ഫില്‍ ജോലി നോക്കുന്ന നസീര്‍ സ്വന്തമായി ഹോട്ടല്‍ തുടങ്ങി പച്ച പിടിച്ചു വരുന്നതിനിടയിലാണ് ദാരുണ സംഭവം. ഏഴുമാസം മുമ്പാണ് നസീര്‍ നാട്ടിലെത്തി മടങ്ങിയത്. മൃതദേഹം സഊദിയില്‍ തന്നെ കബറടക്കുമെന്ന് ബന്ധുക്കള്‍ അറിയിച്ചു. ഭാര്യ: സീന. മക്കള്‍: മുഹമ്മദ് ആഷിഖ് ( 13), നെഹ്‌റാ നസീര്‍ (5), നസറി (3). സഹോദരങ്ങള്‍: അസീസ്, മാജിദ, റഫീക്ക്, നസീറ, ലത്തീഫ, സബൂറ, അസീന, നൗഷാദ്.