കണ്ണൂര്‍: പയ്യന്നൂരിലെ ഇരട്ടക്കൊലപാതകങ്ങളിലെ പ്രധാന പ്രതികള്‍ പിടിയില്‍. ഇവരുടെ അറസ്റ്റ് ഇന്ന് രേഖപ്പെടുത്തിയേക്കും. സി.പി.എം പ്രവര്‍ത്തകന്റെ കൊലപാതകത്തില്‍ നാലു ബി.ജെ.പി പ്രവര്‍ത്തകരും ബി.ജെ.പി പ്രവര്‍ത്തകന്റെ കൊലപാതകത്തില്‍ രണ്ടു സി.പി.എമ്മുകാരും പിടിയിലായി.

സി.പി.എം പ്രവര്‍ത്തകനായ സി.വി ധനരാജിന്റെയും ബി.ജെ.പി പ്രവര്‍ത്തകനായ സി.കെ രാമചന്ദ്രനെയും കൊലപ്പെടുത്തിയ കേസിലെ പ്രധാന പ്രതികളെയാണ് പൊലിസ് അറസ്റ്റ് ചെയ്തത്.
സംഭവത്തിനു ശേഷം പ്രതകള്‍ക്കായി പൊലിസ് വ്യാപക തിരച്ചില്‍ ആരംഭിച്ചിരുന്നു. രണ്ട സംഭവങ്ങളുമായി ബന്ധപ്പെട്ട് അറുപതിലധികം പേര്‍ക്കെതിരേ പൊലിസ് കേസെടുത്തിരുന്നു. രണ്ടു കൊലപാതകം നടക്കുന്നത് മണിക്കൂറുകള്‍ക്കിടയിലാണ്.

ആദ്യം കൊല്ലപ്പെട്ടത് സി.പി.എം പ്രവര്‍ത്തകനായ ഡി.വൈ.എഫ്.ഐ രമാന്തളി സൗത്ത് വില്ലേജ് മുന്‍ സെക്രട്ടറി കാരന്താട്ടെ സി.വി ധനരാജാണ്. ധനരാജിനെ വീട്ടിലേക്കു വരവെ വീട്ടുവരാന്തയില്‍ പതിയിരുന്ന സംഘം വെട്ടിപരുക്കേല്‍പ്പിക്കുകയായിരുന്നു. പിന്നീട് ഇതിന്റെ തുടര്‍ച്ചയായി രാത്രി ഒരു മണിയോടെ ബി.എം.എസ് പയ്യന്നൂര്‍ മേഖലാ പ്രസിഡന്റും ഓട്ടോ ഡ്രൈവറുമായ സി.കെ രാമചന്ദ്രനും (52) വെട്ടേറ്റു മരിച്ചു. വീട്ടിലേക്ക് ബോംബെറിഞ്ഞ് ഭീതി പരത്തിയ ശേഷം രാമചന്ദ്രനെ വെട്ടുകയായിരുന്നു.