തേഞ്ഞിപ്പലം: ഭവനരഹിതര്‍ക്ക് 250 വീടുകള്‍ നിര്‍മിച്ചുനല്‍കുന്ന കാലിക്കറ്റ് സര്‍വകലാശാലാ നാഷണല്‍ സര്‍വിസ് സ്‌കീം പദ്ധതിയുടെ ഭാഗമായി പ്രവൃത്തി പൂര്‍ത്തീകരിച്ച അന്‍പതാമത് വീടിന്റെ താക്കോല്‍ദാനം വളയംകുളം അസ്സബാഹ് കോളജില്‍ നടന്ന ചടങ്ങില്‍ സ്പീക്കര്‍ പി. ശ്രീരാമകഷ്ണന്‍ നിര്‍വഹിച്ചു.
സര്‍വകലാശാലാ എന്‍.എസ്.എസിന്റെ പദ്ധതി മാതൃകയാണെന്ന് അദ്ദേഹം പറഞ്ഞു. വിദ്യാഭ്യാസം കേവലം ബിരുദങ്ങളുടെയല്ല, സംസ്‌കാരത്തിന്റെ ഉന്നതിയാകുകയാണ്. മനുഷ്യനെന്ന നിലയില്‍ നേടേണ്ട പല കഴിവുകളും പാഠ്യപദ്ധതിയില്‍ നിന്ന് ലഭ്യമാകണമെന്നില്ല. ഈ കുറവ് നികത്താനുള്ള പ്രസ്ഥാനമായി എന്‍.എസ്.എസിനെ കണക്കാക്കാം, അദ്ദേഹം കൂട്ടിച്ചേര്‍ത്തു.
പദ്ധതി പ്രകാരം നിര്‍മിച്ച 250 വീടുകളും ഗുണഭോക്താക്കള്‍ക്ക് ഈ വര്‍ഷാവസാനത്തോടെ കൈമാറുമെന്ന് വൈസ് ചാന്‍സലര്‍ ഡോ. കെ. മുഹമ്മദ് ബഷീര്‍ പറഞ്ഞു. രാഷ്ട്രത്തിന്റെ പ്രശ്‌നങ്ങള്‍ പരിഹരിക്കേണ്ടത് യുവജനങ്ങളാണ്. ജാതി-മത-രാഷ്ട്രീയ വ്യത്യാസമില്ലാതെ പ്രവര്‍ത്തിക്കുന്ന നാഷണല്‍ സര്‍വിസ് സ്‌കീം യുവജനങ്ങളെ ഇതിന് പ്രാപ്തരാക്കുമെന്നും അദ്ദേഹം പറഞ്ഞു. സുവര്‍ണജൂബിലി വര്‍ഷത്തിലെ സുപ്രധാന പരിപാടിയാണ് എന്‍.എസ്.എസ് ഭവനിര്‍മാണ പദ്ധതി.
മലപ്പുറം, കോഴിക്കോട്, വയനാട്, പാലക്കാട്, തൃശൂര്‍ ജില്ലകളിലാണ് വീടുകള്‍ നിര്‍മിക്കുന്നത്. ഓഗസ്റ്റ് 15ഓടെ നൂറ് വീടുകള്‍ കൈമാറുമെന്ന് എന്‍.എസ്.എസ് പ്രോഗ്രാം കോര്‍ഡിനേറ്റര്‍ പി.വി വല്‍സരാജന്‍ പറഞ്ഞു. കോളജ് പ്രിന്‍സിപ്പല്‍ പ്രൊഫ. വി.കെ അബൂബക്കര്‍, എന്‍.എസ്.എസ് പ്രോഗ്രാം കോഡിനേറ്റര്‍ പി.വി വല്‍സരാജന്‍, പ്രോഗ്രാം ഓഫിസര്‍ കെ.യു പ്രവീണ്‍ പങ്കെടുത്തു. ആലങ്കോട് പഞ്ചായത്ത് പ്രസിഡന്റ് ആയിഷാ ഹസന്‍ അധ്യക്ഷയായി.