എടവണ്ണപ്പാറ: വാഴക്കാട് പൊലിസ് സ്റ്റേഷന്‍ ഉപരോധിക്കുകയും എസ്.ഐ എസ്. സന്തോഷ് താമസിക്കുന്ന ക്വാര്‍ട്ടേഴ്‌സ് ആക്രമിച്ച് കേടുവരുത്തുകയും ചെയ്ത പതിനഞ്ചോളം പേര്‍ക്കെതിരേ വാഴക്കാട് പൊലിസ് കേസെടുത്തു. പാര്‍ട്ടി പതാകയെ അവഹേളിക്കുകയും നേതാവിനോട് അപമര്യാദയോടെ പെരുമാറുകയും ചെയ്തു എന്നാരോപിച്ച് കഴിഞ്ഞ ദിവസം സി.പി.എം പ്രവര്‍ത്തകര്‍ പൊലിസ് സ്റ്റേഷന്‍ ഉപരോധിച്ചിരുന്നു.
കൊണ്ടോട്ടി സി.ഐ ഹനീഫയുമായി നടത്തിയ ചര്‍ച്ചയെ തുടര്‍ന്ന് ഉപരോധം അവസാനിപ്പിച്ചു. ഇതിന് ശേഷമാണ് വാഴക്കാട് എസ്.ബി.ഐക്ക് മുകളിലായി എസ്.ഐ താമസിക്കുന്ന ക്വാര്‍ട്ടേഴ്‌സ് അജ്ഞാത സംഘം തകര്‍ത്തത്. ജനലുകളും വാതിലുകളും ചവിട്ടിപ്പൊളിക്കുകയും സാധനങ്ങള്‍ നശിപ്പിക്കുകയും ചെയ്തിരുന്നു. ഊര്‍ക്കടവില്‍ പൊതുസ്ഥലത്ത് സ്ഥാപിച്ച വിവിധ പാര്‍ട്ടികളുടെ പതാക വാഴക്കാട് എസ്.ഐ സന്തോഷിന്റെ നേതൃത്വത്തിലുള്ള പൊലിസ് സംഘം എടുത്തുമാറ്റിയിരുന്നു.