ആനക്കര: പഞ്ചായത്തുകളില്‍ സ്റ്റേഡിയം നിര്‍മ്മിക്കുമെന്ന് സര്‍ക്കാര്‍ പ്രഖ്യാപനത്തില്‍ പ്രതീക്ഷകളോടെ പറക്കുളം നിവാസികള്‍. പറക്കുളം കുന്നിലെ ചേക്കോട് ഗാന്ധിമേനോന്‍ മൈതാനം വിട്ടുകിട്ടാനുളള സമരം നടന്നുകൊണ്ടിരിക്കുന്ന വേളയിലാണ് പഞ്ചായത്തുകളില്‍ സര്‍ക്കാര്‍ സ്റ്റേഡിയ നിര്‍മ്മിക്കുമെന്ന് പ്രഖ്യാപനം വന്നത്.
പറക്കുളം വ്യവസായ പാര്‍ക്കിന്റെ ഭാഗമായി വ്യവസായ വകുപ്പ് ഏറ്റെടുത്ത് സ്ഥലത്താണ് ഗാന്ധിമേനോന്‍ മൈതാനം സ്ഥിതിചെയ്യുന്നത്. ഇവിടെയാണ് സര്‍ക്കാര്‍ ഫണ്ട് ഉപയോഗിച്ച് സ്‌റ്റേഡിയം നിര്‍മ്മിക്കണമെന്ന് നാട്ടുകാര്‍ ആവശ്യപ്പെടുന്നത്.
നേരത്തെ ജില്ലാ, ബ്ലോക്ക്, കപ്പൂര്‍ പഞ്ചായത്ത് എന്നിവയ്ക്ക് ഇവിടെ സ്റ്റേഡിയം നിര്‍മ്മിക്കുന്ന കാര്യത്തില്‍ അനുകൂല നിലപാടാണുളളതെന്ന് ഗാന്ധിമേനോന്‍ മൈതന സംരക്ഷണ സമിതി പ്രവര്‍ത്തകര്‍ പറയുന്നു. സ്വാതന്ത്രസമര പ്രവര്‍ത്തനങ്ങള്‍ക്ക് നേതൃത്വം കൊടുത്ത ഗാന്ധിമേനോന്‍ എന്ന ടി.എന്‍. രാവുണ്ണിമേനോന്റെ സ്മണാര്‍ത്ഥമുളള ഈ മൈതാനമാണിത്. പതിറ്റാണ്ടുകളായി ഈ മേഖലയിലുളള നൂറ് കണക്കിന് കുട്ടികള്‍ ഈ ഗ്രൗണ്ടില്‍ കളിക്കുന്നു.
1942 ല്‍ ക്വിറ്റ് ഇന്ത്യ സമരം നടക്കുന്ന സമയത്താണ് രാവുണ്ണി മേനോന്റെ നേതൃത്വത്തില്‍ കോണ്‍ഗ്രസ് പ്രവര്‍ത്തകര്‍ സംഘടിച്ചിരുന്നത് ഈ ഗ്രൗണ്ടിലായിരുന്നെന്ന് പഴമക്കാര്‍ പറയുന്നു. ചര്‍ക്കാക്ലാസുകള്‍, രാഷ്ട്രീയ ക്ലാസുകള്‍ എന്നിവയെല്ലാം രാവുണ്ണിമേനോന്റെ നേതൃത്വത്തില്‍ നടന്നിരുന്നത് ഇവിടെ വച്ചായിരുന്നു. അന്ന് ഗാന്ധിജിയുടെ പ്രതിരൂപമായിട്ടാണ് നാട്ടുകാര്‍ രാവുണ്ണിമേനോനെ കണ്ടിരുന്നത്.
അദ്ദേഹത്തിന്റെ ഓര്‍മ്മക്കായിട്ടാണ് ഈ സ്ഥലത്തിന് ഗാന്ധിമേനോന്‍ മൈതാനമെന്ന് പേര് നല്‍കിയത്. നാലേക്കര്‍ വരുന്ന ഇവിടെ ഇദ്ദേഹത്തിന്റെ പേരില്‍ സ്റ്റേഡിയം നിര്‍മ്മിക്കണമെന്നാവശ്യപ്പെട്ട് മുന്‍ മുഖ്യമന്ത്രി ഉമ്മന്‍ചാണ്ടിക്ക് അടക്കം സമരസമിതിയുടെ നേതൃത്വത്തില്‍ നാട്ടുകാര്‍ നിവേദനം നല്‍കിയിരുന്നു. പുതിയ ബജറ്റില്‍ പഞ്ചായത്തുകളില്‍ സ്റ്റേഡിയം നിര്‍മ്മിക്കുമെന്ന് പ്രഖ്യാപിച്ച സാഹചര്യത്തില്‍ വ്യവസായ വകുപ്പ് സ്ഥലം പഞ്ചായത്തിന് സ്റ്റേഡിയം നിര്‍മ്മിക്കാന്‍ വിട്ടുനല്‍കണമെന്നും സ്റ്റേഡിയത്തിന് ഗാന്ധിമേനോന്റെ പേരിടണമെന്നുമാണ് നാട്ടുകാരും സമര സമിതി ഭാരവാഹികളും കായിക പ്രേമികളും ആവശ്യപ്പെടുന്നത്.