വടകര: ബൈപ്പാസില്‍ ലിങ്ക് റോഡ് കവാടത്തിനു സമീപത്തെ വ്യാപാരസ്ഥാപനങ്ങളില്‍ നിന്നു പുറന്തള്ളുന്ന മാലിന്യം പരിസരവാസികള്‍ക്ക് ഭീഷണിയാകുന്നു. കിണറുകള്‍ മലിനമാകുന്നതിനെതിരേ രംഗത്തുവന്ന നാട്ടുകാരും ബി.ജെ.പി പ്രവര്‍ത്തകരും സ്ഥാപനങ്ങള്‍ ഉപരോധിച്ചു. ശക്തമായ പ്രതിഷേധത്തിനൊടുവില്‍ സ്ഥാപനങ്ങളായ ഫാമിലി വെഡ്ഡിങ് സെന്റര്‍, മലബാര്‍ ഗോള്‍ഡ് എന്നിവ അടച്ചു. സെപ്റ്റിക് ടാങ്കില്‍ നിന്ന് ഉള്‍പ്പെടെയുള്ള മാലിന്യം പുറത്തേക്ക് ഒഴുകി സമീപത്തുകാരുടെ സൈ്വരജീവിതത്തിനു വെല്ലുവിളിയായിരിക്കുകയാണ്. നാട്ടുകാരുടെ പരാതിയെ തുടര്‍ന്നു മുനിസിപ്പല്‍ അധികൃതര്‍ സ്ഥാപനങ്ങള്‍ക്ക് നോട്ടിസ് നല്‍കിയെങ്കിലും ഫലപ്രദമായ നടപടി കൈക്കൊണ്ടില്ലെന്ന പരാതി ശക്തമാണ്.
ഇതേ തുടര്‍ന്നാണ് നാട്ടുകാരോടൊപ്പം പ്രതിഷേധവുമായി ബി.ജെ.പി പ്രവര്‍ത്തകരും രംഗത്തുവന്നത്. രണ്ടു സ്ഥാപനങ്ങളിലെയും മലിനജലം ഒഴുക്കുന്ന ടാങ്ക് നിറഞ്ഞുകവിഞ്ഞ് പുറത്തേക്കൊഴുകുന്നുവെന്ന്  നാട്ടുകാര്‍ പരാതിപ്പെട്ടു. സമീപത്തെ കിണറുകള്‍ മലിനമായതായും നാട്ടുകാര്‍ പറഞ്ഞു. പ്രദേശത്ത് നാട്ടുകാര്‍ പ്രതിഷേധവുമായെത്തിയതോട നഗരസഭാ അധികൃതരും പൊലിസും സ്ഥലത്തെത്തി. വിഷയത്തില്‍ സ്ഥാപന അധികൃതരെയും പരിസരവാസികളെയും വിളിച്ചുവരുത്തി നഗരസഭാ വൈസ് ചെയര്‍പേഴ്‌സണ്‍ കെ.പി ബിന്ദുവിന്റെ സാന്നിധ്യത്തില്‍ ചര്‍ച്ച നടത്തിയെങ്കിലും പ്രശ്‌നത്തിന് പരിഹാരം കാണാനായില്ല.