ഉപ്പള: ഉപ്പളയില്‍ പൂട്ടിയിട്ട വീട് കുത്തിത്തുറന്ന് സ്വര്‍ണവും പണവും കവര്‍ന്നു. ഉപ്പള മജലിലെ ഷേഖ് അബ്ദുല്‍ റഹ്മാന്റെ വീട്ടിലാണ് കവര്‍ച്ച നടന്നത്. ആറര പവന്‍ സ്വര്‍ണാഭരണവും 22000 രൂപയുമാണ് കവര്‍ന്നത്. ചൊവ്വാഴ്ച അബ്ദുല്‍ റഹ്മാനും കുടുംബവും വീടുപൂട്ടി കര്‍ണാടക സീമുഖയിലെ ആശുപത്രിയില്‍ കഴിയുന്ന ബന്ധുക്കളെ കാണാന്‍ പോയതായിരുന്നു. ഇന്നലെ ഉച്ചയോടെ തിരിച്ചെത്തിയപ്പോഴാണ് കവര്‍ച്ച നടന്ന വിവരം അറിയുന്നത്.
വീടിന്റെ മുന്‍ഭാഗത്തെ വാതില്‍ തകര്‍ത്ത നിലയിലാണ്. അകത്തെ രണ്ട് അലമാരകള്‍ കുത്തിത്തുറന്നാണ് കവര്‍ച്ച നടത്തിയത്. മറ്റൊരു പെട്ടിയില്‍ സൂക്ഷിച്ചിരുന്ന 15 പവന്‍ ആഭരണങ്ങള്‍ നഷ്ടപ്പെട്ടിട്ടില്ല. മഞ്ചേശ്വരം പൊലിസ് സ്ഥലത്തെത്തി അന്വേഷണം തുടങ്ങി. വിരലടയാള വിദഗ്ധരും സ്ഥലത്തെത്തി പരിശോധന നടത്തി.