കിളിമാനൂര്‍: സംസ്ഥാന ഫലമാണ് ചക്കയെങ്കിലും ചക്കയോടുള്ള മലയാളിയുടെ അവഗണന തുടരുകയാണ്. അതിനാല്‍ 'ചക്കേ നീ കരയണ്ട' എന്ന മുദ്രാവാക്യവുമായി കുട്ടികള്‍ കൈകോര്‍ക്കുകയാണ്. ഇതിന്റെ ഭാഗമായി ഇന്നലെ കിളിമാനൂര്‍ ആര്‍.ആര്‍.വി ഗേള്‍സ് ഹയര്‍ സെക്കന്‍ഡറി സ്‌കൂളില്‍ ചക്ക മഹോത്സവം സംഘടിപ്പിച്ചു.
ചക്ക കൊണ്ടുള്ള 186 വിവിധ തരത്തിലുള്ള വിഭവങ്ങള്‍ കുട്ടികള്‍ ഉണ്ടാക്കി സ്‌കൂളില്‍ കൊണ്ടു വരികയും വിദ്യാര്‍ഥികള്‍ അവ പ്രദര്‍ശനത്തിന് വെക്കുകയും ചെയ്തു. നേരത്തെ ചക്ക കൊണ്ടുള്ള വിഭവങ്ങളുടെ പ്രദര്‍ശനവും രുചിച്ചു നോക്കാന്‍ അവസരവും ഉണ്ടെന്നറിയിച്ചതിനാല്‍ രക്ഷിതാക്കളും എത്തിയിരുന്നു. പഞ്ചായത്ത് പ്രസിഡന്റ് രാജലക്ഷ്മി അമ്മാള്‍ ചക്ക മുറിച്ച് ഉദ്ഘാടനം നിര്‍വഹിച്ചു. വാര്‍ഡ് മെംബര്‍ ബീന വേണു ഗോപാല്‍, ബി.എസ് റജി പങ്കെടുത്തു.
ചക്ക ദോശ,ചക്ക ലഡു, ചക്ക കുരു പ്രഥമന്‍, ചക്ക ഉപ്പുമാവ്, ചക്ക വട, ചക്ക ബര്‍ഫീ, ചക്ക അരവണ, ചക്ക അച്ചാര്‍, ചക്ക ചവിണ്ണി ചിപ്‌സ്, ചക്ക തോരന്‍, ചക്ക ആലുവ, ചക്ക ഉണ്ണി അപ്പം, ചക്ക ചമ്മന്തി, ചക്കകൊണ്ടുള്ള പാനീയം, ചക്ക ചവിണി ഫ്രൈ, ചക്ക കേക്ക്, ചക്ക സമൂസ ചക്കയപ്പം തുടങ്ങിയവയായിരുന്നു വിഭവങ്ങള്‍ ഇന്നലെ സ്‌കൂളില്‍ ഉച്ചഭക്ഷണത്തിനും ചക്കവിഭവങ്ങള്‍ ആയിരുന്നു ഒരുക്കിയിരുന്നത്.
ചക്കക്കും പ്ലാവിനും പ്രതീക്ഷക്ക് വകയുണ്ടെന്ന് പ്രദര്‍ശനം വിളിച്ചു പറയുന്നുണ്ടായിരുന്നു.