കൊച്ചി: മനുഷ്യത്വം മുതലാളിത്വത്തിന് അടിയറവ് വെയ്ക്കുന്ന കോര്‍പറേറ്റ് ഫാസിസമാണ് രാജ്യത്ത് നിലനില്‍ക്കുന്നതെന്ന് പ്രമുഖ എഴുത്തുകാരന്‍ കെ.പി.രാമനുണ്ണി .എസ്.കെ.എസ്.എസ്.എഫ് മദീന പാഷനില്‍ ഇന്ത്യ ഫാസിസത്തിനെതിര് എന്ന വിഷയത്തിലുള്ള സെമിനാര്‍ മുണ്ടം പാലത്ത് ഉദ്ഘാടനം ചെയ്യുകയായിരുന്നു അദ്ദേഹം. ഫാസിസം ഒരു മനോഭാവമാണ് .അപരനെ സഹിക്കാന്‍ കഴിയാത്ത അവസ്ഥയാണ് ഫാസിസം സൃഷ്ടിക്കുന്നത് .ഇന്ത്യയുടെ പാരമ്പര്യം ഫാസിസത്തിനെതിരായിരുന്നു.
കൊളോണിയല്‍  സാമ്രാജ്യത്വതമാണ് ഫാസിസത്തിന് ഇന്ത്യയില്‍ വിത്ത് വിതച്ചത്. ഇന്ന് ഹിന്ദുത്വ വാദികള്‍ ഉയര്‍ത്തുന്ന ഫാസിസം ഹൈന്ദവതയുടെ തനിമ ഇല്ലാതാക്കുന്നതാണ്. ഹിന്ദുത്വ വാദം ഹിന്ദുക്കള്‍ക്ക് തന്നെ ഭീഷണിയാകും.ഫാസിസത്തിനെതിരായ പോരാട്ടം നമ്മുടെ തലമുറയ്ക്ക് വേണ്ടിയുള്ള ജീവന്‍മരണ പോരാട്ടമായി കാണണമെന്നും രാമനുണ്ണി പറഞ്ഞു.
പി.സി.വിഷ്ണുനാഥ് , സുപ്രഭാതം എക്‌സിക്യുട്ടീവ് എഡിറ്റര്‍ എ.സജീവന്‍ എന്നിവര്‍ വിഷയാവതരണം നടത്തി.ഡോ.സുബൈര്‍ ഹുദവി ചേകന്നൂര്‍ മോഡറേറ്റയിരുന്നു. മാര്‍ട്ടിന്‍ ജോസഫ്, പി.എച്ച് ഷൈലേഷ്‌കുമാര്‍, ജുനൈദ്, ഷബീര്‍ ഷാജഹാന്‍, അശ്വിന്‍ പി.ദിനേശ്, പി എം മാര്‍ഷല്‍, റഈസ് എന്നിവര്‍ പ്രസംഗിച്ചു. മദീന പാഷന് തുടക്കം കുറിച്ച് കൊണ്ട് മുണ്ടംപാലം ഹുദൈബിയ നഗരിയില്‍ സമസ്ത കേന്ദ്ര മുശാവറ അംഗം ഇ.എസ് ഹസ്സന്‍ ഫൈസി പതാക ഉയര്‍ത്തി.
അബൂബക്കര്‍ ഫൈസി, സയ്യിദ് ഷഫീഖ് തങ്ങള്‍, ഫൈസല്‍ കങ്ങരപ്പടി എന്നിവര്‍ സംബന്ധിച്ചു. സയ്യിദ് ഷറഫുദ്ദീന്‍ തങ്ങള്‍ പ്രാര്‍ത്ഥനയ്ക്ക് നേതൃത്വം നല്‍കി. സൈനുദ്ദീന്‍ വാഫി സ്വാഗതവും ആസിഫ് കാരുവള്ളി നന്ദിയും പറഞ്ഞു.