വടകര: രാജ്യത്തെ ശിഥിലമാക്കി ഭരണം നടത്തുന്ന വര്‍ഗീയ ശക്തിയായ ബി.ജെ.പിക്ക് ബദലാവാന്‍ കോണ്‍ഗ്രസിന് കഴിയില്ലെന്നതാണ് ഇന്നുവരെയുള്ള ചരിത്രം സൂചിപ്പിക്കുന്നതെന്ന് മുഖ്യമന്ത്രി പിണറായി വിജയന്‍. എല്‍.ഡി.എഫ് വടകര നിയമസഭാ മണ്ഡലം തെരഞ്ഞെടുപ്പ് റാലിയും പൊതുയോഗവും വടകര കോട്ടപ്പറമ്പില്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
വര്‍ഗീയതയോടുള്ള വിട്ടുവീഴ്ച സമീപനമാണ് കോണ്‍ഗ്രസ് മുന്നോട്ട് വയ്ക്കുന്നത്. ബാബരി മസ്ജിദ് തകര്‍ക്കാന്‍ അന്നത്തെ കോണ്‍ഗ്രസിന്റെ ഭരണകൂടം ഒത്താശ ചെയ്യുകയാണുണ്ടായത്. അസം പൗരത്വബില്ല്, മുത്തലാഖ്, പശുവിന്റെ പേരിലുള്ള ആള്‍ക്കൂട്ടക്കൊല എന്നിവയോടും കോണ്‍ഗ്രസ് സമീപനം തെറ്റാണ്. ബി.ജെ.പിയെ തകര്‍ക്കാന്‍ ആത്മാര്‍ഥത കോണ്‍ഗ്രസിനില്ലെന്നതിന് തെളിവാണ് ഉത്തര്‍പ്രദേശിലെ തെരഞ്ഞെടുപ്പ്.
ബി.എസ്.പി-എസ്.പി എന്നിവയുമായി മഹാകക്ഷിയായി പ്രവര്‍ത്തിച്ച് ബി.ജെ.പിയെ ഒറ്റപ്പെടുത്താന്‍ കോണ്‍ഗ്രസിനെ ക്ഷണിച്ചപ്പോള്‍ കോണ്‍ഗ്രസ് കേട്ടഭാവം നടിച്ചില്ല. ബി.ജെ.പിക്ക് എതിരായി ലഭിക്കുന്ന വോട്ടുകള്‍ ശിഥിലമാക്കാനാണ് കോണ്‍ഗ്രസ് ശ്രമിച്ചതെന്നും പിണറായി പറഞ്ഞു. ഈ തെരഞ്ഞെടുപ്പില്‍ 18ല്‍ കൂടുതല്‍ സീറ്റ് ഇടതുമുന്നണി നേടുമെന്നും പിണറായി വ്യക്തമാക്കി.
ചടങ്ങില്‍ എല്‍.ഡി.എഫ് തെരഞ്ഞെടുപ്പ് കമ്മിറ്റി മണ്ഡലം ചെയര്‍മാന്‍ എ.ടി ശ്രീധരന്‍ അധ്യക്ഷനായി. മന്ത്രി കടന്നപ്പള്ളി രാമചന്ദ്രന്‍, സി.കെ നാണു എം.എല്‍.എ, ഡോ. വര്‍ഗീസ് ജോര്‍ജ്, സി.എന്‍ ചന്ദ്രന്‍, പി.കെ ദിവാകരന്‍ സംസാരിച്ചു.