കൊളത്തൂര്‍: സിനിമാ സ്റ്റൈലില്‍ ഹവാല ക്വട്ടേഷന്‍ സംഘങ്ങള്‍ തമ്മില്‍ ഏറ്റുമുട്ടി. ഇന്നലെ ഉച്ചയോടെ കൊടുവള്ളി ഭാഗത്തു നിന്നു ഹവാല പണവുമായി ബസ് മാര്‍ഗമെത്തിയ കൊടുവള്ളി സ്വദേശി അബ്ദുറഹ്മാ(56) നെ ക്വട്ടേഷന്‍ സംഘം തട്ടിക്കൊണ്ടുപോകാന്‍ ശ്രമിച്ചതാണു സംഘര്‍ഷത്തിനിടയാക്കിയത്. അബ്ദുറഹ്മാന്‍ ബസ് മാര്‍ഗം പുലാമന്തോളിലെത്തി ചെമ്മലശ്ശേരിയിലേക്ക് ഓട്ടോയില്‍ പോകുന്നതിനിടെ സംഘം പിന്തുടരുകയായിരുന്നു. ചെമ്മലശ്ശേരിയില്‍വെച്ച് അബ്ദുറഹ്മാന്‍ ഓട്ടോയില്‍ നിന്നും ഇറങ്ങുന്നതിനിടെ ക്വട്ടേഷന്‍ സംഘത്തിലെ രണ്ടുപേര്‍ കൈയേറ്റം ചെയ്ത് ഇന്നോവ കാറില്‍ കയറ്റി കൊണ്ടു പോകുകയായിരുന്നു. എന്നാല്‍ വഴിമധ്യേ വാഹനത്തില്‍ നിന്നും ചാടാന്‍ ശ്രമിച്ചതു നാട്ടുകാര്‍ ശ്രദ്ധിച്ചു.
കാറിനകത്തുനിന്നുള്ള നിലവിളി കേട്ട് സമീപവാസികള്‍ അറിയിച്ചതിനെത്തുടര്‍ന്നു കാര്‍ മൂര്‍ക്കനാട്ട് നാട്ടുകാര്‍ ബൈക്ക് റോഡിനു കുറുകെയിട്ടു തടയാന്‍ ശ്രമിച്ചെങ്കിലും പിടികൂടാനായില്ല. പടിഞ്ഞാറ്റുംപുറം റോഡ് സൈഡില്‍ നിര്‍ത്തിയിട്ട മറ്റൊരു ബൈക്കും സംഘം ഇടിച്ചുതകര്‍ത്തു. തുടര്‍ന്നു വെങ്ങാട് കരുപറമ്പു റോഡില്‍ വെച്ചു നാട്ടുകാര്‍ വാഹനം തടഞ്ഞു നിര്‍ത്തി.
രോഷാകുലരായ നാട്ടുകാര്‍ വാഹനം തല്ലിതകര്‍ത്തു.കൊളത്തൂര്‍ പൊലിസ് സ്റ്റേഷനില്‍ വിവരമറിയിച്ചതിനെത്തുടര്‍ന്ന് എസ്.ഐ പി വിഷ്ണുവും സംഘവും വളാഞ്ചേരിയില്‍ നിന്നു പൊലിസ് ഉദ്യോഗസ്ഥരും സ്ഥലത്തെത്തി. പെരിന്തല്‍മണ്ണ സി.ഐ സിദ്ധീഖ്, എസ്.ഐ ജോബി തോമസ് എന്നിവര്‍ സ്ഥലത്തെത്തിയതിനു ശേഷമാണ് നാട്ടുകാര്‍ ശാന്തരായത്.വാഹനത്തിലുണ്ടായിരുന്ന അഞ്ചംഗ ക്വട്ടേഷന്‍ സംഘത്തേയും പണവുമായി എത്തിയ അബ്ദുറഹ്മാനെയും പൊലിസ് കസ്റ്റഡിലെടുത്തു. മാലാപറമ്പ് എം.ഇ.എസ് മെഡിക്കല്‍ കോളജ് ആശുപത്രിയില്‍ ആറു പേരും ചികിത്സയിലാണിപ്പോള്‍.കണ്ണൂര്‍ കൂത്തുപറമ്പ് പഴയ തിരുത്ത് പടാംപൊയി വീട്ടില്‍ സക്കീര്‍ (27), മട്ടന്നൂര്‍ കള റോഡ് സുബ്ഹി വീട്ടില്‍ ഷാനിഫ് (25), കൂത്തുപറമ്പ് നിര്‍മലഗിരി ഹിറ മന്‍സില്‍ റഹീസ് (26), കൂത്തുപറമ്പ് ശങ്കരനെല്ലൂര്‍ ഫിറോസ് മന്‍സിലില്‍ റനീസ് (32) എന്നിവരാണ് അറസ്റ്റിലായത്. സംഭവത്തിനിടെ അബ്ദുറഹ്മാന്റെ കയ്യിലുണ്ടായിരുന്ന 5.1 ലക്ഷം രൂപയില്‍ നിന്നും 3.6 ലക്ഷം രൂപ മാത്രമേ വാഹനത്തില്‍ നിന്നും ലഭിച്ചുള്ളൂ. പണം നഷ്ടപ്പെട്ടതും പൊലിസ് അന്വേഷിക്കുന്നുണ്ട്.