മങ്കട: മങ്കട ഗവ. ഹൈസ്‌കൂളിന് പൂര്‍വ്വ വിദ്യാര്‍ഥികള്‍ സജ്ജീകരിച്ചു നല്‍കിയ വിവിധോദ്ദേശ്യ തിയേറ്ററിന്റെ ഉദ്ഘാടനം വിദ്യാലയ മുന്‍ പ്രധാനാധ്യാപകന്‍ ടി ഹംസ മാസ്റ്റര്‍ നിര്‍വ്വഹിച്ചു. 1990 - 91 ലെ എസ്.എസ്.എല്‍.സി ബാച്ച് വിദ്യാര്‍ഥികളാണ് ആധുനിക സംവിധാനത്തോടെയുള്ള തിയേറ്റര്‍ നിര്‍മിച്ചു നല്‍കിയത്. കെ.പി ഹമീദ് ഹാജി, ഇബ്രാഹീം, സാദിഖ്, ടി. ഹംസ മാസ്റ്റര്‍ എന്നിവര്‍ നിര്‍മിച്ചു നല്‍കിയ ക്ലാസ് മുറികളുടെ ഉദ്ഘാടനവും, 1981- 82 എസ്.എസ്.എല്‍.സി ബാച്ച് വിദ്യാര്‍ഥികള്‍ നവീകരിച്ചു സജ്ജമാക്കിയ ക്ലാസ് മുറിയുടെ ഉദ്ഘാടനവും നടന്നു.
പി.ടി.എ പ്രസിഡന്റ് അഡ്വ. അസ്ഗറലി അധ്യക്ഷനായി. മങ്കട ബ്ലോക്ക് പ്രസിഡന്റ് സഹീദ എലിക്കോട്ടില്‍, ജില്ലാ പഞ്ചായത്തംഗം ടി.കെ റഷീദലി മുഖ്യാഥിതികളായി. പഞ്ചായത്ത് വൈസ് പ്രസിഡന്റ് പി അബ്ബാസലി, കെ. പി ഹമീദ് ഹാദി, പി.ടി അന്‍വര്‍, ഹഫീദ് തയ്യില്‍ സമസദ് പറച്ചിക്കോട്ടില്‍, ഡോ. സിജിന്‍, അസ് ലം മാസ്റ്റര്‍ സംസാരിച്ചു.