ന്യൂഡല്‍ഹി: ആര്‍ട്ട് ഓഫ് ലിവിങ് സ്ഥാപകന്‍ ശ്രീ ശ്രീ രവിശങ്കറിന് ദേശീയ ഹരിത ട്രൈബ്യൂണലിന്റെ കോടതിയലക്ഷ്യ നോട്ടിസ്.
യമുനാ നദീതീരത്തെ പരിസ്ഥിതി നാശത്തിന് കാരണം ഹരിത ട്രൈബ്യൂണലും കേന്ദ്രസര്‍ക്കാരുമാണെന്ന പ്രസ്താവനയുടെ പേരിലാണ് നടപടി. മെയ് ഒന്‍പതിനകം മറുപടി നല്‍കണമെന്നാവശ്യപ്പെട്ട് ഹരിത ട്രൈബ്യൂണല്‍ ചെയര്‍മാന്‍ സ്വതന്തര്‍ കുമാറാണ് നോട്ടിസ് നല്‍കിയത്. മനോജ് മിശ്ര നല്‍കിയ ഹരജിയെ തുടര്‍ന്നാണ് നടപടി. സ്വതന്ത്ര നിയമവാഴ്ചക്കുമേലുള്ള കടന്നുകയറ്റമാണ് രവിശങ്കറിന്റെ പരാമര്‍ശങ്ങളെന്ന് ഹരജിയില്‍ ആരോപിച്ചിരുന്നു.
ആര്‍ട്ട് ഓഫ് ലിവിങ് യമുനാ തീരത്ത് സംഘടിപ്പിച്ച ലോക സാംസ്‌കാരിക സമ്മേളനത്തെ തുടര്‍ന്ന് പരിസ്ഥിതി നാശം സംഭവിച്ചിരുന്നു. ഇതിനേത്തുടര്‍ന്ന് അഞ്ചുകോടി പിഴ അടക്കാന്‍ ഹരിത ട്രൈബ്യൂണല്‍ ആവശ്യപ്പെട്ടിരുന്നു.
എന്നാല്‍, പരിപാടിക്ക് അനുമതി നല്‍കിയ കേന്ദ്ര സര്‍ക്കാരും ഹരിത ട്രൈബ്യൂണലുമാണ് പരിസ്ഥിതി നാശത്തിന് ഉത്തരവാദികളെന്ന നിലപാടിലാണ് രവിശങ്കര്‍.