പാലാ: പാലാ മുണ്ടുപാലം സെന്റ് തോമസ് പള്ളിയില്‍ നടന്ന നാല്പതാം വെള്ളി ആചരണം ഭക്തിനിര്‍ഭരമായി. യേശുദേവന്‍ സഹിച്ച പീഡാനുഭവവും കുരിശിന്റെ വഴിയും വിശ്വാസികള്‍ക്ക് മുമ്പില്‍ പുനരാവിഷ്‌കരിച്ചു. കുരിശിന്റെ വഴി കടന്നുപോകുന്ന 14 സ്ഥലങ്ങളിലും ഓരോ സ്ഥലത്തെയും പ്രത്യേകതകളും സംഭവങ്ങളും വേഷഭൂഷാധികള്‍ ധരിച്ച കലാകാരന്മാരാല്‍ ചിത്രീകരിച്ചു. കുരിശിന്റെ വഴിയില്‍ പങ്കെടുത്തവര്‍ക്ക് ദുഖ:വെള്ളിയില്‍ ഗാഗുല്‍ത്താ മലയില്‍ യേശുവിന് അനുഭവിക്കേണ്ടി വന്ന പീഡനങ്ങളും കുരിശുമരണവും നേരില്‍ കാണുന്ന അനുഭവമായി. നിറകണ്ണുകളോടെയും പ്രാര്‍ത്ഥനാമന്ത്രങ്ങള്‍ ഉരുവിട്ടും ലോകരക്ഷകനായി അവര്‍ പ്രാര്‍ത്ഥിക്കുന്ന കാഴ്ചകളായിരുന്നു എങ്ങും.
മുണ്ടുപാലം പള്ളിയില്‍ നിന്നും ആരംഭിച്ച് വലവൂര്‍ റോഡിലൂടെ ബോയ്‌സ് ടൗണ്‍- രാമപുരം റോഡ് വഴി തിരികെയെത്തുന്നതായിരുന്നു 14 പുണ്യസ്ഥലങ്ങള്‍. 1958 വരെ പാലാ ളാലം പഴയപള്ളിയില്‍ നടത്തിവന്നിരുന്ന പീഡാനുഭവ പ്രദര്‍ശനത്തിന്റെ പുനരാവിഷ്‌ക്കാരമായിരുന്നു മുണ്ടുപാലത്ത് നടന്നത്. മുണ്ടുപാലം പിതൃവേദി, മാതൃവേദി, എസ്.എം.വൈ.എം എന്നിവയുടെ സംയുക്താഭിമുഖ്യത്തിലാണ് പരിപാടി സംഘടിപ്പിച്ചത്. പാലാ രൂപതാ ജുഡീഷ്യല്‍ വികാര്‍ റവ.ഡോ. ജോസഫ് മുകളേപ്പറമ്പില്‍ ദിവ്യബലി അര്‍പ്പിച്ചു. ളാലം പഴയപള്ളി വികാരി ഫാ. ജോണ്‍സണ്‍ പുള്ളീറ്റ് കുരിശിന്റെ വഴിക്ക് മുഖ്യകാര്‍മികത്വം വഹിച്ചു. ഫാ. ജോണ്‍സണ്‍ പാക്കരമ്പേല്‍, ഫാ. ജോര്‍ജ് വരകുകാലാപറമ്പില്‍, ഫാ. മാത്യു പുതിയിടം, ഫാ. ഫ്രാന്‍സീസ് പാറപ്ലാക്കല്‍ പ്രാര്‍ത്ഥനകള്‍ക്ക് നേതൃത്വം നല്‍കി. അസി. വികാരി ഫാ. മൈക്കിള്‍ വടക്കേക്കര ദൃശ്യാവിഷ്‌കരണത്തിന്റെ സംവിധാനവും സഹായവും നല്‍കി. ജോഷി വട്ടക്കുന്നേല്‍, പ്രൊഫ. ചാള്‍സ് ചേറ്റുകുളം, അനൂപ് വൈപ്പന, ജിജി ഈരൂരിക്കല്‍, സണ്ണി കടിയാമറ്റത്തില്‍, സനല്‍ അമ്പലപ്പറമ്പില്‍ എന്നിവര്‍ നേതൃത്വം നല്‍കി.