കൊച്ചി: നടി ലീന മരിയപോളിന്റെ ബ്യൂട്ടി പാര്‍ലറിനു നേരെ നടന്ന വെടിവയ്പ് കേസ് വഴിത്തിരിവിലേക്ക്. വെടി വയ്ക്കാനുള്ള തോക്ക് എത്തിച്ചു നല്‍കിയത് അധോലോക നേതാവ് രവി പൂജാരിയെന്ന് അന്വേഷണ സംഘം വ്യക്തമാക്കി. കൂടാതെ തോക്ക് ഉപയോഗിച്ച് പ്രതികള്‍ വെടിവച്ച് പരിശീലനം നടത്തുകയും ചെയ്തതായി വിവരം ലഭിച്ചു.
നിലവില്‍ കേസുമായി ബന്ധപ്പെട്ട് മൂന്നുപേരാണ് കസ്റ്റഡിയിലുള്ളത്. ബൈക്കിലെത്തി വെടിയുതിര്‍ത്ത വിപിന്‍, ബിലാല്‍ ഇതിനായി സഹായം ചെയ്ത അല്‍ത്താഫ് എന്നിവരാണ് ക്രൈംബ്രാഞ്ച് കസ്റ്റഡിയിലുള്ളത്. മൂവരെയും ചോദ്യം ചെയ്തതില്‍നിന്ന് നിര്‍ണായക വിവരങ്ങള്‍ അന്വേഷണ സംഘത്തിന് ലഭിച്ചിട്ടുണ്ട്. രവി പൂജാരിയുടെ നേതൃത്വത്തില്‍ കാസര്‍കോട്ടെ മോനായി എന്നറിയപ്പെടുന്ന ക്രിമിനല്‍ സംഘത്തലവന്‍ പ്രതികളായ ആളുകള്‍ക്ക് തോക്ക് എത്തിക്കുകയായിരുന്നു. പരിശീലനം നടത്തുന്നതിനായി ഏഴു തിരകള്‍ ഉപയോഗിച്ചെന്നും വിവരമുണ്ട്. എന്നാല്‍ ഇവര്‍ മുന്‍പ് തീരെ തോക്ക് ഉപയോഗിക്കാത്തവരല്ലെന്നും പ്രതിയായ ബിലാലിന് സ്വന്തമായി തോക്കുണ്ടായിരുന്നുവെന്നും ഉദ്യോഗസ്ഥര്‍ വ്യക്തമാക്കി.
പിടിയിലായ വിപിന് വൈരാഗ്യമുണ്ടായിരുന്ന ഒരാളെ കൃത്യത്തിന് മുന്‍പ് തോക്ക് ചൂണ്ടി ഭീഷണിപ്പെടുത്തുകയും ചെയ്തിട്ടുണ്ട്. പ്രതികളുമായി അന്വേഷണ സംഘം ഇന്നലെ തെളിവെടുപ്പ് നടത്തി. 'അമേരിക്ക' എന്ന പേരിട്ട് ക്വട്ടേഷന്‍ സംഘങ്ങള്‍ വിളിക്കുന്ന ആലുവ എന്‍.എ.ഡിയിലെ കാടുപിടിച്ച് കിടക്കുന്ന ഒളിത്താവളത്തിലാണ് പ്രതികളെ എത്തിച്ച് തെളിവെടുത്തത്. കൂടുതല്‍ പേര്‍ കേസില്‍ ഉള്‍പ്പെട്ടിട്ടുണ്ടെന്നാണ് നിഗമനം. നിരവധി ആളുകള്‍ ഇതുമായി ബന്ധപ്പെട്ട് നിരീക്ഷണത്തിലുണ്ട്. ബ്യൂട്ടി പാര്‍ലറിന് നേരെ നിറയൊഴിക്കാന്‍ പ്രാദേശിക സഹായമൊരുക്കിയ കൊല്ലം സ്വദേശിയായ ഡോക്ടറെക്കുറിച്ചും അന്വേഷണം പുരോഗമിക്കുകയാണ്.
താനല്ല ആയുധങ്ങള്‍ എത്തിച്ചു നല്‍കിയതെന്ന് ഒരു സ്വകാര്യ ചാനലിനോട് പിടിയിലായ അല്‍ത്താഫ് പറയുന്ന വിഡിയോ ദൃശ്യം പുറത്തുവന്നെങ്കിലും അതില്‍ കഴമ്പില്ലെന്നാണ് അന്വേഷണ സംഘം കരുതുന്നത്. അല്‍ത്താഫിന്റെ താമസ സ്ഥലത്തുനിന്ന് അന്വേഷണ സംഘം തോക്കും ബൈക്കും കണ്ടെടുത്തിരുന്നു. അതേസമയം മോനായിക്ക് കേസിലുള്ള പങ്കിനെക്കുറിച്ചും ഇയാള്‍ വിഡിയോയില്‍ വ്യക്തമാക്കുന്നുണ്ട്.
ലീന മരിയപോളിന്റെ പനമ്പള്ളി നഗറിലുള്ള ബ്യൂട്ടി പാര്‍ലറിന് നേരെ ഡിസംബര്‍ 15നാണ് വെടിവയ്പുണ്ടായത്. ബൈക്കിലെത്തിയ മുഖംമൂടിധാരികള്‍ വെടിയുതിര്‍ക്കുകയായിരുന്നു. നടിയും അധോലോക കുറ്റവാളി രവി പൂജാരിയും തമ്മിലുണ്ടായിരുന്ന പണമിടപാടുമായി ബന്ധപ്പെട്ട പ്രശ്‌നങ്ങളാണ് ഇതിലേക്ക് നയിച്ചതെന്നാണ് വിലയിരുത്തല്‍.