പാറ്റ്‌ന: നടന്‍ സുശാന്ത് സിങ് രാജ്പുതിന്റെ മരണവുമായി ബന്ധപ്പെട്ട് സംശയങ്ങളുയരവേ, സുശാന്തിന്റെ മുന്‍ മാനേജര്‍ ദിശ സാലിയന്റെ മരണവും അന്വേഷിക്കാന്‍ ബിഹാര്‍ പൊലിസിന്റെ തീരുമാനം. ജൂണ്‍ എട്ടിന് മുംബൈയിലെ മലാദില്‍ കെട്ടിടത്തിനു മുകളില്‍നിന്നു വീണായിരുന്നു ദിശ മരിച്ചത്. ഇതിന് ഒരാഴ്ച തികയും മുന്‍പാണ് സുശാന്തിനെ മുംബൈയിലെ വസതിയില്‍ തൂങ്ങി മരിച്ച നിലയില്‍ കണ്ടെത്തിയിരുന്നത്.

സുശാന്തിന്റെ മരണം ആത്മഹത്യയാണെന്നായിരുന്നു നിഗമനമെങ്കിലും അല്ലെന്ന ആരോപണവുമായി പിതാവടക്കം രംഗത്തെത്തിയിട്ടുണ്ട്. സുശാന്തിന്റെ പെണ്‍സുഹൃത്ത് 15 കോടി രൂപ തട്ടിയെടുത്തെന്ന പരാതിയുമായി പിതാവ് രംഗത്തെത്തിയതോടെ അന്വേഷണം മറ്റൊരു ദിശയിലേക്കു നീങ്ങുകയാണ്. സുശാന്തിന്റെ മരണം സി.ബി.ഐ അന്വേഷിക്കണമെന്ന ആവശ്യം ഇതിനകം ഉയര്‍ന്നിട്ടുണ്ട്. എന്നാല്‍, ഇതുമായി ബന്ധപ്പെട്ട ഒരു ഹരജി കഴിഞ്ഞ ദിവസം സുപ്രിംകോടതി തള്ളിയിരുന്നു.