തിരുവമ്പാടി: വിധവയായ സ്ത്രീയുടെ പരാതിയെ തുടര്‍ന്ന് തിരുവമ്പാടി പോലിസ് കസ്റ്റഡിയിലെടുത്ത യുവാവിന്  അനുകൂലമായി രംഗത്തെത്തിയ സി.പി.എം നേതൃത്വത്തിനെതിരേ പ്രവര്‍ത്തകര്‍ക്കിടയില്‍ കടുത്ത രോഷപ്രകടനം.
പാര്‍ട്ടി ഏരിയ കമ്മിറ്റി അംഗമായ ഒരു നേതാവിന്റെ മകനെ കഴിഞ്ഞ ദിവസം പൊലിസ് കസ്റ്റഡിയിലെടുത്തിരുന്നു .യുവാവിനെതിരേ  പോലിസ് കേസെടുക്കാനിരിക്കെ പാര്‍ട്ടിയുടെ കടുത്ത സമ്മര്‍ദ്ദത്തില്‍ സ്ത്രി പരാതിയില്‍ നിന്ന് പിന്മാറുകയായിരുന്നു. ഇതിനിടെ ഒത്തുതീര്‍പ്പിനായി പൊലിസ് സ്റ്റേഷനിലെത്തിയ  മറ്റൊരു ഏരിയ കമ്മിറ്റി അംഗമായ ജോളി ജോസഫും എസ്.ഐ യുമായി വാക്കേറ്റമുണ്ടായി.എസ്.ഐ ഏരിയ കമ്മിറ്റി അംഗത്തോട് പരാക്രമം കാണിച്ചതായി വെള്ളിയാഴ്ച സി.പിഎം പാര്‍ട്ടി മുഖപത്രമായ ദേശാഭിമാനി വാര്‍ത്ത പ്രസിദ്ധികരിച്ചിരുന്നു.
ഇതോടെ പാര്‍ട്ടിക്കുള്ളില്‍ ഏറെ കാലമായി നില നില്‍ക്കുന്ന ഭിന്നത മറനീക്കി പുറത്ത് ചാടി.
ചില പാര്‍ടി അംഗങ്ങള്‍ തന്നെയാണ് പേര് വെളിപ്പെടുത്തരുതെന്ന അഭ്യര്‍ത്ഥനയോടെ പാര്‍ടിയിലെ അമര്‍ഷം വെളിപ്പെടുത്തിയത്.
തിരുവമ്പാടി  എസ്.ഐ.സംസ്ഥാന സര്‍ക്കാറിന്റെ പോലിസ് നയത്തിന് വിരുദ്ധമായി പ്രവര്‍ത്തിക്കുന്നുവെന്നാണ് സി.പി.എം പ്രാദേശിക നേതൃത്വത്തിന്റെ ആരോപണം.
അതേസമയം, അധാര്‍മിക പ്രവര്‍ത്തനത്തിന് പൊലിസ് പിടികൂടിയ ഏരിയ കമ്മിറ്റി അംഗത്തിന്റെ മകനെ സംരക്ഷിച്ച പാര്‍ട്ടി നേതൃത്വത്തിനെതിരേ പ്രവര്‍ത്തകര്‍ക്കിടയില്‍ അമര്‍ഷം പുകയുകയാണ്.
സ്ത്രിയുടെ പരാതിയില്‍ നിയമവാഴ്ച ഉറപ്പ് വരുത്താനാണ് പൊലിസ് ശ്രമിച്ചതെന്ന് പാര്‍ട്ടിയിലെ ഒരു വിഭാഗം പറയുന്നു.
ഇരക്കൊപ്പം നില്‍ക്കാതെ വേട്ടക്കാരനെ സഹായിക്കുന്ന സമീപനമാണ് പാര്‍ട്ടി നേതൃത്വം സ്വീകരിക്കുന്നതെന്നാണ് ഈ വിഭാഗത്തിന്റെ  ആക്ഷേപം.