പള്ളിക്കല്‍: മോഷ്ടിച്ച ചന്ദനം പിക്കപ്പ് വാനില്‍ കടത്തുന്നതിനിടെ പ്രതികള്‍ പൊലിസിന്റെ പിടിയിലായി. ഞായറാഴ്ച വൈകിട്ട് നാലോടെ തേഞ്ഞിപ്പലം പൊലിസിന്റെ വാഹന പരിശോധനക്കിടെ പറമ്പില്‍ പീടികയില്‍വച്ചാണ് വാഹനം പിടികൂടിയത്. പിക്കപ്പ് വാനിലെ ഡ്രൈവര്‍ പറമ്പില്‍ പീടിക സ്വദേശി കാരാട്ട് ഇസ്മാഈലിനെ പൊലിസ് അറസ്റ്റ് ചെയ്തു.
വിവിധയിടങ്ങളില്‍ നിന്നായി മോഷ്ടിച്ച ചന്ദന മരങ്ങള്‍ മുറിച്ച് ചീളുകളാക്കി ചാക്കില്‍ നിറച്ച നിലയില്‍ വില്‍പനക്ക് കൊണ്ട് പോകവേയാണ് പൊലിസ് പിടികൂടിയത്.
അഡീഷനല്‍എസ്.ഐ സുബ്രഹ്മണ്യന്‍, സി.പി.ഒമാരായ പ്രഭീഷ്, രഹ്‌നാസ് എന്നിവരുടെ നേതൃത്വത്തിലായിരുന്നു വാഹന പരിശോധന. വാഹനവും ഡ്രൈവറേയും ഇന്ന് കോടതിയില്‍ ഹാജരാക്കും.