ചങ്ങരംകുളം: മണവാട്ടിയുടെ വീട്ടില്‍ മണവാളന്റെ കൂട്ടുകാര്‍ അഴിഞ്ഞാടിയ സംഭവത്തില്‍ വളാഞ്ചേരി സ്വദേശികളായ അഞ്ചുപേര്‍ക്കെതിരെ പൊന്നാനി പൊലിസ് കേസെടുത്തു. കഴിഞ്ഞ ദിവസം അഞ്ചോടെ എടപ്പാളിനടുത്ത് മാണൂരിലെ വിവാഹ വീട്ടിലാണ് കേസിനാസ്പദമായ സംഭവം.
പുതുമണവാളനൊപ്പം എത്തിയ സുഹൃത്തുകള്‍ മണവാട്ടിയുടെ വീട്ടില്‍ നടത്തിയ അഴിഞ്ഞാട്ടത്തെ  ചോദ്യം ചെയ്തത് സംഘര്‍ഷത്തില്‍ കലാശിക്കുകയായിരുന്നു. സ്ത്രീകളും കുട്ടികളും അടക്കം നിരവധി പേര്‍ക്ക് പരുക്കേല്‍ക്കുകയും സംഭവം കണ്ട് നിന്ന പലരും ബോധരഹിതരാവുകയും ചെയ്തിരുന്നു .
ആക്രമണത്തില്‍ വധുവിന്റെ അഞ്ച് ബന്ധുക്കള്‍ക്ക് പരുക്കേറ്റു. മാതൃ സഹോദരി വളാഞ്ചേരി സ്വദേശി കുന്നത്ത് ആമിനക്കുട്ടി, കുന്നത്ത് ബീയ്യാത്തുട്ടി, ഒന്‍പതു വയസുകാരി ഫാത്തിമ ശബാന, ആമിനക്കുട്ടിയുടെ മകന്‍ ഷബീബ്, ബന്ധു ശിബിലാല്‍ എന്നിവര്‍ക്കാണ് പരുക്കേറ്റത്. സംഭവത്തില്‍ ആമിനക്കുട്ടിയുടെ പരാതി പ്രകാരമാണ് വരന്റെ സുഹൃത്തുക്കളായ സനില്‍ ബാബു, മന്‍സൂര്‍, നിസാര്‍ തുടങ്ങിയ കണ്ടാലറിയാവുന്ന അഞ്ചോളം പേര്‍ക്കെതിരെ പൊന്നാനി  പൊലിസ് കേസെടുത്തത്.
പുതുമണവാട്ടിയേയുമായി പുറപ്പെട്ട വാഹനത്തിന് ബൈക്കുകളില്‍ പിന്തുടര്‍ന്ന സുഹൃത്തുക്കള്‍ കാട്ടിയ കോപ്രായം ചോദ്യം ചെയ്തതാണ് പ്രശ്‌നങ്ങളുടെ തുടക്കം. ഇത് ചോദ്യം ചെയ്ത വധുവിന്റെ മാതൃസഹോദരിയേയും ബന്ധുക്കളേയും യുവാക്കള്‍ ആക്രമിക്കുകയായിരുന്നു. അഴിഞ്ഞാട്ടം അതിരുവിട്ടതോടെ കാഴ്ചക്കാരായ പല സ്ത്രീകളും ബോധരഹിതരായി. ഒടുവില്‍ സഹികെട്ട നാട്ടുകാര്‍ യുവാക്കളെ കൈകാര്യം ചെയ്യാന്‍ രംഗത്ത് ഇറങ്ങിയതോടെ ബൈക്കുകളില്‍ കയറി എല്ലാവരും രക്ഷപ്പെടുകയായിരുന്നു.