മണ്ണഞ്ചേരി: പള്ളി ദര്‍സുകള്‍ നാടിന്റെ ഉയര്‍ച്ചയ്ക്ക് കാരണമെന്ന് പാണക്കാട് അബ്ബാസലി ശിഹാബ് തങ്ങള്‍.
മണ്ണഞ്ചേരി കിഴക്കേ മഹല്ലില്‍ പുതുതായി പണികഴിപ്പിച്ച മര്‍ഹൂം സയ്യിദ് ഫസല്‍ തങ്ങള്‍ ചേലാട് സ്മാരക ദര്‍സ് കേന്ദ്രത്തിന്റെയും ദര്‍സ് വാര്‍ഷിക യാത്രയയപ്പ് സമ്മേളനത്തിന്റെയും ഉദ്ഘാടനം നിര്‍വഹിച്ച് സംസാരിക്കുകയായിരുന്നു തങ്ങള്‍. ദര്‍സ് സംവിധാനം സുഗമമായി നടത്തിക്കൊണ്ടുപോകല്‍ മഹല്ല് നിവാസികളുടെ ബാധ്യതയാണെന്നും പള്ളി ദര്‍സുകളിലൂടെ പൊതു സമൂഹത്തിന് ഗുണകരമാകുന്ന യുവതയെ വാര്‍ത്തെടുക്കാന്‍ ആകുമെന്നും തങ്ങള്‍ പറഞ്ഞു.
മഹല്ല് പ്രസിഡന്റ് എം.എ.അബൂബക്കര്‍കുഞ്ഞ് ആശാന്‍ അധ്യക്ഷനായി. മഹല്ല് ഖത്വീബും മുദര്‍രിസുമായ എ.എം.മീരാന്‍ ബാഖവി ആമുഖ പ്രഭാഷണവും എ.പി.അഹ്മദ് നൂര്‍ മുസ്‌ലിയാര്‍ കുഴിവേലിപ്പടി അനുഗ്രഹ പ്രഭാഷണവും സര്‍ട്ടിഫിക്കറ്റുകളുടെ വിതരണവും നിര്‍വഹിച്ചു.
എസ്.മുഹമ്മദ് കോയ തങ്ങള്‍ ചേലാട്,കേരള സര്‍വ്വകലാശാല മുന്‍ ഡീന്‍ ഡോ.വി.പി.മുഹമ്മദ് കുഞ്ഞ് മേത്തര്‍,പൊന്നാട് മഹല്ല് പ്രസിഡന്റ് എ.മുഹമ്മദ് കുഞ്ഞ്,വടക്കനാര്യാട് മഹല്ല് പ്രസിഡന്റ് കെ.എ.നൗഷാദ്, മണ്ണഞ്ചേരി പടിഞ്ഞാറെ മഹല്ല് സെക്രട്ടറി എം.മുജീബ് റഹ്മാന്‍,സി.എം.മുഹമ്മദ് മുസ്‌ലിഹ് ബാഖവി,ലുഖ്മാനുല്‍ ഹക്കീം ബാഖവി, ടി.ഷാജിമോന്‍,സിറാജ് കമ്പിയകം, കെ.എസ്.അബ്ദുല്ലാക്കുഞ് തുടങ്ങിയവര്‍ സംസാരിച്ചു. പ്രദേശത്ത് നിന്നും എം.ബി.ബി.എസില്‍ ഉന്നത വിജയം കരസ്ഥമാക്കിയ റാസാ മുറാദ്,അന്‍വര്‍ ഷാ,ഷംന ഷംസ്,മുഹ്‌സിന എന്നിവരെയും മഹല്ലിലെ 1381 കുടുംബങ്ങളുടെ വിവരശേഖരണം 35 ദിനങ്ങള്‍ കൊണ്ട് പൂര്‍ത്തീകരിച്ച് ഡേറ്റാ എന്‍ട്രി നടത്തി കംപ്യൂട്ടര്‍വല്‍ക്കരിക്കാന്‍ നേതൃത്വ പരമായ പങ്ക് വഹിച്ചതിന് മഹല്ല് സെക്രട്ടറി ഒ.എം.എ.റെഷീദ് ഊരാളി വീടിനെയും, ദര്‍സ് കേന്ദ്രത്തിന്റെ നിര്‍മാണ പ്രവര്‍ത്തനങ്ങള്‍ക്ക് മേല്‍നോട്ടം വഹിച്ച് കുറ്റമറ്റ രീതിയില്‍ നിര്‍മാണം പൂര്‍ത്തീകരിച്ചതിന് കമ്മറ്റി അംഗം സുഹൈല്‍ നൈയെവും, എഞ്ചിനിയര്‍ ഷാഹുല്‍ ഹമീദ് നൈയെയും സമ്മേളനത്തില്‍ ആദരിച്ചു ഉസ്താദ് എ.എം.മീരാന്‍ ബാഖവിക്ക് ദര്‍സ് സമാജത്തിന്റെ വകയായി ഉപഹാരവും നല്‍കി. വിവരശേഖരണത്തിന്റെ രേഖകള്‍ ജനറല്‍ സെക്രട്ടറിക്ക് കൈമാറി പ്രകാശനം നിര്‍വ്വഹിച്ചു ജനറല്‍ സെക്രട്ടറി പി.എ.മൈതീന്‍കുഞ് മേത്തര്‍ സ്വാഗതവും സെക്രട്ടറി ഒ.എം.എ.റെഷീദ് ഊരാളി വീട് നന്ദിയും പറഞ്ഞു.