നെടുമ്പാശ്ശേരി:വിദേശത്ത് നിന്നും മടങ്ങിയെത്തി നെടുമ്പാശ്ശേരി അന്താരാഷ്ട്ര വിമാനത്താവളത്തില്‍ വിമാനമിറങ്ങിയ ശേഷം അപ്രത്യക്ഷനായ യുവാവിനെ രഹസ്യ ഭാര്യയുടെ വീട്ടില്‍ നിന്നും പോലീസ് കണ്ടെത്തി.
ബന്ധുക്കളുടെ പരാതിയെ തുടര്‍ന്ന് നെടുമ്പാശ്ശേരി പോലീസ് നടത്തിയ അന്വേഷണത്തിലാണ് പാലക്കാട് തൃത്താല സ്വദേശി അന്‍വര്‍ സാദിഖി (30)നെ മാളയിലുള്ള രഹസ്യ ഭാര്യയുടെ വീട്ടില്‍ നിന്നും പോലീസ് പിടികൂടിയത്.കുവൈറ്റില്‍ സ്വകാര്യ സ്ഥാപനത്തില്‍ ജീവനക്കാരനായിരുന്ന അന്‍വര്‍ സാദിഖ് കഴിഞ്ഞ 18 നാണ് അവധിക്കായി നാട്ടിലെത്തിയത്.ഈ വിവരം അറിഞ്ഞ് ഇയാളെ സ്വീകരിക്കാന്‍ ബന്ധുക്കള്‍ വിമാനത്താവളത്തിലെത്തിയിരുന്നു.
എന്നാല്‍ നെടുമ്പാശേരിയില്‍ വിമാനമിറങ്ങിയ ശേഷം സ്വീകരിക്കാനെത്തിയ കുടുംബാംഗങ്ങളെ കാണാതെ ഇയാള്‍ തൃശൂര്‍ മാളയിലുള്ള രഹസ്യ ഭാര്യയുടെ വീട്ടിലേക്ക് മുങ്ങുകയായിരുന്നു.
വിമാനം ലാന്റിംഗിന് ശേഷം മണിക്കൂറുകള്‍ കാത്തുനിന്നിട്ടും ഇയാളെ കാണാതിരുന്നതിനെ തുടര്‍ന്ന് ബന്ധുക്കള്‍ വിമാനകമ്പനിയുമായി ബന്ധപ്പെട്ടപ്പോള്‍ യാത്രക്കാരുടെ ലിസ്റ്റില്‍ അന്‍വര്‍ ഉണ്ടായിരുന്നെന്നും പരിശോധനകള്‍ക്ക് ശേഷം പുറത്തിറങ്ങിയതായും വിവരം ലഭിച്ചു.തുടര്‍ന്ന് ബന്ധുക്കള്‍ നെടുമ്പാശേരി പൊലീസില്‍ 'മാന്‍ മിസിംഗി'ന് പരാതി നല്‍കുകയായിരുന്നു.ഇതിന്റെ അടിസ്ഥാനത്തില്‍ നെടുമ്പാശേരി എസ്.ഐ സോണി മത്തായിയുടെ നേതൃത്വത്തില്‍ നടത്തിയ അന്വേഷണത്തിലാണ് അന്‍വര്‍ മാളയിലുണ്ടെന്ന വിവരം ലഭിച്ചത്. ഇതോടെ മാലയിലെത്തി പോലീസ് കസ്റ്റഡിയിലെടുക്കുകയായിരുന്നു.