വാഷിങ്ടണ്‍: സ്വന്തം അന്ത്യചിത്രം പകര്‍ത്തി മരണത്തിലേക്ക് നടന്നുപോയ ആളെ കുറിച്ച് കേട്ടിട്ടുണ്ടോ? ഇല്ലെങ്കിലിതാ, അമേരിക്കന്‍ സൈന്യത്തില്‍ സ്‌പെഷലിസ്റ്റ് ഫോട്ടോഗ്രാഫറായി പ്രവര്‍ത്തിച്ച യുവതി അങ്ങനെയൊരു ധീരകൃത്യം നടത്തിയിരിക്കുന്നു. വര്‍ഷങ്ങള്‍ക്കു മുന്‍പ് അഫ്ഗാനിസ്ഥാനില്‍ സൈനികസേവനത്തിലുണ്ടായിരുന്ന 22കാരിയായ അമേരിക്കന്‍ സൈനിക ഹില്‍ഡ ക്ലായ്റ്റണ്‍ ആണ് സ്വന്തം മരണ ചിത്രം പകര്‍ത്തിവച്ച് ചരിത്രത്തില്‍ ഇടംനേടിയത്. സംഭവത്തിന്റെ വാര്‍ത്തയും ചിത്രവും അമേരിക്ക കഴിഞ്ഞ ദിവസം പുറത്തുവിടുകയായിരുന്നു.
2013 ജൂലൈയില്‍ യു.എസ് സൈനിക ഉദ്യോഗസ്ഥരുടെ മേല്‍നോട്ടത്തില്‍ നടന്ന പരിശീലനത്തിനിടെയാണ് മോര്‍ട്ടാര്‍ ട്യൂബ് പൊട്ടിത്തെറിച്ച് ഹില്‍ഡയും മറ്റു നാല് അഫ്ഗാന്‍ നാഷനല്‍ ആര്‍മി(എ.എന്‍.എ) സൈനികരും മരിച്ചത്. സ്വന്തം ദാരുണാന്ത്യത്തിന്റെ ചിത്രം കാമറയില്‍ പകര്‍ത്തി ഹില്‍ഡ ചരിത്രത്തിലേക്ക് മറയുകയായിരുന്നു. സംഭവം നടന്ന് ഏകദേശം നാലുവര്‍ഷങ്ങള്‍ക്കു ശേഷമാണ് അവരോടുള്ള ആദരസൂചകമായി ചിത്രം യു.എസ് സൈന്യത്തിന്റെ മള്‍ട്ടി മീഡിയാ സംഘമായ ആര്‍മി യൂനിവേഴ്‌സിറ്റി പ്രസ് പുറത്തുവിട്ടത്. ഹില്‍ഡയുടെ ചിത്രത്തോടൊപ്പം മറ്റൊരു എ.എന്‍.എ സൈനികന്‍ പകര്‍ത്തിയ അപകടത്തിന്റെ ദൃശ്യവും പ്രസ് പ്രസിദ്ധീകരിച്ചിട്ടുണ്ട്.
ഹില്‍ഡയുടെ കുടുംബത്തിന്റെ സമ്മതത്തോടെയാണ് സൈന്യം ചിത്രം പുറത്തുവിട്ടത്.