മുംബൈ: ചാംപ്യന്‍സ് ട്രോഫി ക്രിക്കറ്റിനുള്ള ഇന്ത്യന്‍ ടീമിനെ ഉടന്‍ തന്നെ തിരഞ്ഞെടുക്കണമെന്ന് സുപ്രിം കോടതി നിയമിച്ച സമിതി ബി.സി.സി.ഐക്ക് നിര്‍ദേശം നല്‍കി. ഭരണ സമിതി തലവന്‍ ഇക്കാര്യം ചൂണ്ടിക്കാട്ടി ബോര്‍ഡിന് കത്തും നല്‍കിയിട്ടുണ്ട്.
സെലക്ഷന്‍ കമ്മിറ്റി യോഗം ചേര്‍ന്ന് ടീമിനെ ഉടന്‍ തന്നെ പ്രഖ്യാപിക്കണമെന്ന നിര്‍ദേശമാണ് സമിതി മുന്നോട്ടു വച്ചത്. അടുത്ത മാസം ഒന്ന് മുതല്‍ ഇംഗ്ലണ്ടിലാണ് ചാംപ്യന്‍സ് ട്രോഫി പോരാട്ടം അരങ്ങേറുന്നത്. നിലവിലെ ചാംപ്യന്‍മാരാണ് ഇന്ത്യ.
ചാംപ്യന്‍സ് ട്രോഫിക്കുള്ള ടീമിനെ പ്രഖ്യാപിക്കാനുള്ള അവസാന തിയതി കഴിഞ്ഞ മാസം 25 ആയിരുന്നു. ബാക്കിയുള്ള ടീമുകളെല്ലാം 15അംഗ സംഘത്തെ പ്രഖ്യാപിച്ചപ്പോള്‍ ഇന്ത്യ ടീമിനെ തിരഞ്ഞെടുത്തിരുന്നില്ല. വരുമാനം പങ്കിടുന്നതുമായി ബന്ധപ്പെട്ട വിവാദങ്ങളും മറ്റുമാണ് ഇക്കാര്യത്തില്‍ ബി.സി.സി.ഐ മെല്ലപ്പോക്ക് നയം സ്വീകരിക്കാന്‍ ഇടയാക്കിയത്.
വിഷയവുമായി ബന്ധപ്പെട്ട് ഐ.സി.സിക്കെതിരേ നിയമപരമായ നടപടികളുമായി മുന്നോട്ടു പോകാന്‍ ബി.സി.സി.ഐ തയറാടുക്കവേയാണ് ഭരണ സമിതിയുടെ ഇപ്പോഴത്തെ നിര്‍ദേശം.
ഇതിഹാസങ്ങളും മുന്‍ നായകന്‍മാരുമായ സച്ചിന്‍ ടെണ്ടുല്‍ക്കറും, രാഹുല്‍ ദ്രാവിഡും ഇന്ത്യ ചാംപ്യന്‍സ് ലീഗില്‍ കളിക്കണമെന്ന അഭിപ്രായം പരസ്യമായി പറഞ്ഞിരുന്നു.
പിന്നാലെ മുന്‍ താരങ്ങളായ സഞ്ജയ് മഞ്ജരേക്കര്‍, സന്ദീപ് പാട്ടീല്‍, ആകാശ് ചോപ്ര, സാബ കരീം, ഗുണ്ടപ്പ വിശ്വനാഥ്, വെങ്കിടേഷ് പ്രസാദ്, മുരളി കാര്‍ത്തിക്ക്, സഹീര്‍ ഖാന്‍ എന്നിവരെല്ലാം ഇതേ അഭിപ്രായം തന്നെ പങ്കുവയ്ക്കുകയുമുണ്ടായി.