ന്യൂഡല്‍ഹി: രാജ്യത്തെ നടുക്കിയ നിര്‍ഭയ കേസില്‍ എല്ലാ പ്രതികള്‍ക്കും വധശിക്ഷ. കേസിലെ നാലു പ്രതികളുടേയും വധശിക്ഷ സുപ്രിം കോടതി ശരിവച്ചു. ഡല്‍ഹി ഹൈക്കോടതി വിധിയാണ് കോടതി ശരി വെച്ചത്.

സമാനതകളില്ലാത്ത ക്രൂരതയെന്നാണ് കോടതി സംഭവത്തെ കുറിച്ച് പ്രതികരിച്ചത്. ഇത് പൈശാചികവും നിഷ്ഠൂരവുമായ കൊലപാതകമായിരുന്നു. രാജ്യത്തിന്റെ മനസ്സാക്ഷിയെ ഞെട്ടിച്ച സംഭവമായിരുന്നുവെന്നും കോടതി ചൂണ്ടിക്കാട്ടി.

ക്രിമിനല്‍ ഗൂഢാലോചന സംശയാതീതമായി തെളിയിക്കപ്പെട്ടു. പെണ്‍കുട്ടിയുടെ മൊഴിയും സിസിടിവി ദൃശ്യങ്ങളും അവഗണിക്കാനാവാത്ത തെളിവുകളെന്നും കോടതി നിരീക്ഷിച്ചു.

2012 ഡിസംബര്‍ 16നാണ് കേസിനാസ്പദമായ സംഭവം. രാത്രി ബസ്സില്‍ യാത്ര ചെയ്ത യുവതിയെ കൂട്ടബലാത്സംഗത്തിനിരയാക്കുകയായിരുന്നു പ്രതികള്‍. കേസിലെ പ്രധാന പ്രതിയായിരുന്ന രാം സിങ്  2013 മാര്‍ച്ചില്‍ തിഹാര്‍ ജയിലില്‍ തൂങ്ങിമരിച്ചിരുന്നു. കുറ്റംചെയ്യുമ്പോൾ പ്രായപൂര്‍ത്തിയാകാത്ത മറ്റൊരു പ്രതി തടവുശിക്ഷയ്ക്കു ശേഷം പിന്നീട് പുറത്തിറങ്ങി. ഒന്നരവര്‍ഷത്തോളം നീണ്ട വാദത്തിനൊടുവിലാണ് കോടതി വിധി പറയുന്നത്.