കോഴിക്കോട്: വോട്ടെടുപ്പിനിടെ വോട്ടിങ് മെഷിനിലെ അട്ടിമറി നടക്കുന്നില്ലെന്ന് ഉറപ്പുവരുത്താന്‍ രാഷ്ട്രീയപ്പാര്‍ട്ടികള്‍ പ്രത്യേക സംഘങ്ങളെ നിയോഗിക്കും.
വിവിധ പാര്‍ട്ടികള്‍ ഇതു സംബന്ധിച്ച നിര്‍ദേശം ഇന്നലെ പ്രവര്‍ത്തകര്‍ക്കു നല്‍കി. ഓരോ ബൂത്തും കേന്ദ്രീകരിച്ച് 10 പ്രവര്‍ത്തകരെ വീതമാണ് പാര്‍ട്ടികള്‍ ഇതിനായി നിയോഗിച്ചത്.
ഇവര്‍ എപ്പോഴൊക്കെ വോട്ട് ചെയ്യണമെന്നും നിര്‍ദേശം നല്‍കി. ഓരോ മണിക്കൂറിലും ഒരാള്‍ വീതം വോട്ടു ചെയ്യുകയാണ് രീതി. തങ്ങള്‍ വോട്ട് ചെയ്ത സ്ഥാനാര്‍ഥിക്ക് തന്നെയാണോ വോട്ട് പോകുന്നതെന്ന വിവിപാറ്റില്‍ ഉറപ്പുവരുത്തുകയാണ് ഇവരുടെ ജോലി.
വോട്ടിങ് മെഷിന്‍ ശരിയാണെന്ന് ഉറപ്പുവരുത്തുകയാണ് ചെയ്യുക. ഓരോരുത്തരും തങ്ങള്‍ വോട്ട് ചെയ്ത മെഷിന്‍ ശരിയാണെന്ന് ഉറപ്പുവരുത്തുകയും പാര്‍ട്ടി ഓഫിസില്‍ റിപ്പോര്‍ട്ടു ചെയ്യുകയുമാണ് രീതി.
മെഷിനിലെ ഏതെങ്കിലും തരത്തിലുള്ള കൃത്രിമം കണ്ടെത്താനാണിത്. പ്രശ്‌ന സാധ്യതയുള്ള ബൂത്തുകളില്‍ രാവിലെ തന്നെ പരമാവധി വോട്ട് ചെയ്യിക്കാനും പാര്‍ട്ടികള്‍ ബോധവല്‍കരണം നടത്തുന്നുണ്ട്.