തളിപ്പറമ്പ്: കേരളത്തിനുള്ള സഹായം തടസപ്പെടുത്തുന്ന കേന്ദ്ര നിലപാടിനെതിരേ പരോക്ഷ വിമര്‍ശനവുമായി വ്യവസായ മന്ത്രി ഇ.പി ജയരാജന്‍. ധര്‍മം കൊടുത്തില്ലെങ്കിലും പട്ടിയെ കൊണ്ട് കടിപ്പിക്കരുതെന്ന് മന്ത്രി. ഇപ്പോള്‍ നിലനില്‍ക്കുന്ന നാടിന്റെ ഐക്യം ആരും ദുര്‍ബലപ്പെടുത്തരുതെന്നും അദ്ദേഹം പറഞ്ഞു. തളിപ്പറമ്പ് താലൂക്ക് ഓഫിസില്‍ മുഖ്യമന്ത്രിയുടെ ദുരിതാശ്വാസ നിധിയിലേക്കുള്ള സഹായം ഏറ്റുവാങ്ങുകയായിരുന്നു അദ്ദേഹം.
വെള്ളം ഇറങ്ങിയപ്പോഴാണ് ദുരന്തത്തിന്റെ വ്യാപ്തി കൂടുതല്‍ വ്യക്തമായത്. 20,000 കോടി രൂപ പോലും കേരളത്തെ വീണ്ടെടുക്കാന്‍ മതിയാകില്ല. പുനരധിവാസമല്ല, പുതിയ കേരളം തന്നെയാണ് നാം സൃഷ്ടിക്കേണ്ടതെന്ന് മന്ത്രി പറഞ്ഞു.
49,01,111 രൂപയാണ് ചടങ്ങില്‍നിന്ന് ദുരിതാശ്വാസ നിധിയിലേക്ക് ലഭിച്ചത്. ഇതിനു പുറമെ ഇന്നലെ വരെയായി വിവിധ സംഘടനകളും വ്യക്തികളും സ്ഥാപനങ്ങളും 32,68,719 രൂപ താലൂക്ക് ഓഫിസില്‍ എത്തിച്ചിരുന്നു. എ.ബി.സി ഗ്രൂപ്പ് ചെയര്‍മാന്‍ മുഹമ്മദ് മദനി (10 ലക്ഷം), മൂത്തേടത്ത് ഹൈസ്‌കൂള്‍ (അഞ്ച് ലക്ഷം), സീല്‍ കമ്മ്യൂണിക്കേഷന്‍ ടി.വി (രണ്ട് ലക്ഷം), നബ്രാസ് ഗ്രൂപ്പ് എം.ഡി നിസാര്‍ അബ്ദുറഹ്മാന്‍ (ഒരു ലക്ഷം), തമ്പുരാന്‍ ലോട്ടറി ഉടമ പി.വി വത്സരാജ് (ഒരു ലക്ഷം), നടന്‍ സന്തോഷ് കീഴാറ്റൂര്‍ (പതിനഞ്ചായിരം രൂപ) തുടങ്ങി നിരവധി പേര്‍ ഇന്നലെ മന്ത്രിക്കു തുക കൈമാറാനെത്തി. വ്യാപാരി വ്യവസായി ഏകോപന സമിതി ടീ ഷര്‍ട്ടുകളും നല്‍കി. പറവൂര്‍, ആലപ്പുഴ എന്നിവിടങ്ങളില്‍ പ്രളയത്തില്‍ അകപ്പെട്ടവരെ രക്ഷാപ്പെടുത്തുന്നതിന് നേതൃത്വം നല്‍കിയ പറശ്ശിനിക്കടവ് സ്വദേശികളായ കെ.വി ബിജു, കെ.വി സുനില്‍, ചാലോട് സ്വദേശി രാജേഷ്, കോള്‍മൊട്ട സ്വദേശി നൗഷാദ് എന്നിവരെ പി.കെ ശ്രീമതി എം.പി ആദരിച്ചു. ജയിംസ് മാത്യു എം.എല്‍.എ അധ്യക്ഷനായി. തളിപ്പറമ്പ് നഗരസഭാ ചെയര്‍മാന്‍ മഹമൂദ് അള്ളാംകുളം, ആന്തൂര്‍ നഗരസഭാ ചെയര്‍പേഴ്‌സന്‍ പി.കെ ശ്യാമള, തളിപ്പറമ്പ് തഹസില്‍ദാര്‍ കെ. സുജാത സംസാരിച്ചു.