തിരുവനന്തപുരം: പ്രളയക്കെടുതിയെ തുടര്‍ന്ന് ദുരിതബാധിത പ്രദേശങ്ങള്‍ ശുചിയാക്കുന്നതിന് പഞ്ചായത്ത് വകുപ്പിന്റെ നേതൃത്വത്തില്‍ 100 ജീവനക്കാര്‍ ഉള്‍പെടുന്ന ആദ്യ സംഘം നാളെ രാവിലെ പത്തനംതിട്ട, ആലപ്പുഴ ജില്ലകളിലേക്കു യാത്രതിരിക്കും. പഞ്ചായത്ത് ഡയരക്ടറേറ്റ്, പഞ്ചായത്ത് ഡെപ്യൂട്ടി ഡയരക്ടര്‍ ഓഫിസ്, പെര്‍ഫോമന്‍സ് ഓഡിറ്റ് യൂനിറ്റുകള്‍ എന്നിവിടങ്ങളിലെ ജീവനക്കാര്‍ ഉള്‍പെട്ടതാണ് സംഘം.
പഞ്ചായത്ത് ഡയരക്ടര്‍ എം.പി അജിത്കുമാറിന്റെ നേതൃത്വത്തിലാണ് സംഘം ശുചീകരണ പ്രവര്‍ത്തനങ്ങള്‍ക്ക് ഇറങ്ങുന്നത്. വെള്ളം കയറി നശിച്ച വീടുകള്‍, സ്ഥാപനങ്ങള്‍, പൊതുസ്ഥലങ്ങള്‍ എന്നിവ ഉപയോഗയോഗ്യമാക്കുന്ന നടപടികള്‍ക്കാണ് മുന്‍ഗണന നല്‍കുന്നത്. തിരുവനന്തപുരം ജില്ലയിലെ 73 ഗ്രാമപഞ്ചായത്തുകളില്‍ നിന്നുള്ള ജീവനക്കാരെ വരും ദിവസങ്ങളില്‍ ഘട്ടംഘട്ടമായി ശുചീകരണ പ്രവര്‍ത്തനങ്ങള്‍ക്ക് നിയോഗിക്കും. ആലപ്പുഴ, പത്തനംതിട്ട ജില്ലാ ഭരണകൂടങ്ങളുമായി ഏകോപിപ്പിച്ചാണ് പ്രവര്‍ത്തനം നടത്തുക. മറ്റു ജില്ലകളില്‍ നിന്നും ടീമുകളെ ഇതിനായി നിയോഗിച്ചിട്ടുണ്ട്. ശുചീകരണം നടത്തുന്നതിന് മുന്നോടിയായി ജീവനക്കാര്‍ക്ക് പരിശീലനവും പ്രതിരോധ കുത്തിവയ്പും മരുന്നും നല്‍കിയിട്ടുണ്ട്. തിരുവനന്തപുരം മെഡിക്കല്‍ കോളജില്‍ നിന്നുള്ള മെഡിക്കല്‍ സംഘമാണ് ഇവ നല്‍കിയത്. ആറു മുതല്‍ എട്ടു പേര്‍ വരെ അടങ്ങുന്ന യൂനിറ്റുകളായിട്ടായിരിക്കും ജീവനക്കാര്‍ ശുചീകരണ പ്രവര്‍ത്തനങ്ങള്‍ നടത്തുക. ശുചീകരണത്തിനാവശ്യമായ എല്ലാ സംവിധാനങ്ങളുമായാണ് ജീവനക്കാര്‍ പുറപ്പെടുക. ഇതിനാവശ്യമായ നാലായിരം ഗംബൂട്ടും ഗ്ലൗസും പൊലിസ് സേനയില്‍ നിന്ന് നല്‍കിയിട്ടുണ്ട്. ശുചീകരണത്തിനു വേണ്ടി വരുന്ന മണ്‍വെട്ടി, മണ്‍കോരി, ചൂല്, ലോഷന്‍, ഗ്ലൗസ്, ബ്ലീച്ചിങ് പൗഡര്‍ തുടങ്ങിയ സാധനങ്ങള്‍ ആവശ്യാനുസരണം കരുതിയിട്ടുണ്ട്.