കൂത്തുപറമ്പ്: പതിനെട്ടു വര്‍ഷം മുന്‍പത്തെ നടുക്കുന്ന തിരഞ്ഞെടുപ്പ് ഓര്‍മയുമായി അസ്‌ന വീണ്ടും വോട്ടു ചെയ്തു. ആരും മറന്നു കാണില്ല, ചെറുവാഞ്ചേരിയിലെ അസ്‌നയെന്ന കൊച്ചു മിടുക്കിയെ.2000 സെപ്തംബര്‍ ഇരുപത്തിയേഴിന് നടന്ന പഞ്ചായത്ത് തിരഞ്ഞെടുപ്പ് ദിനത്തില്‍ നടന്ന ബോംബേറില്‍ വീട്ടുമുറ്റത്തു കളിച്ചുകൊണ്ടിരിക്കുകയായിരുന്ന അസ്‌നക്ക് വലതുകാല്‍ നഷ്ടമാവുകയായിരുന്നു. വീടിനു സമീപത്തെ ചെറുവാഞ്ചേരി പൂവത്തൂര്‍ ന്യൂ എല്‍. പി.സ്‌കൂള്‍ പരിസരത്തായിരുന്നു തിരഞ്ഞെടുപ്പിനിടെ സംഘര്‍ഷമുണ്ടായത്. അക്രമിസംഘം എറിഞ്ഞ ബോംബുകളിലൊന്ന് ദൂരേക്ക് തെറിച്ചുവീണ് പൊട്ടി സമീപത്തെ വീട്ടുമുറ്റത്ത് കളിച്ചു കൊണ്ടിരിക്കുകയായിരുന്ന അഞ്ചു വയസുകാരി അസ്‌നയ്ക്കും സഹോദരനും പരുക്കേല്ക്കുകയായിരുന്നു. ചികിത്സയ്ക്കിടെ അസ്‌നയുടെ വലതുകാല്‍ പിന്നീട് മുറിച്ചു മാറ്റി. കൃത്രിമ കാലുമായി പിന്നീട് അസ്‌ന നടന്നു കയറിയത് അതിജീവനത്തിന്റെ കൊടുമുടിയിലേക്ക്. എം.ബി.ബി.എസിന് കോഴിക്കോട് മെഡിക്കല്‍ കോളജില്‍ പ്രവേശനം നേടിയ അസ്‌ന ഇപ്പോള്‍ പഠനം പൂര്‍ത്തിയാക്കിയിരിക്കുകയാണ്. കോഴിക്കോട്ടെ എം.ബി.ബി.എസ് പീന കാലത്തിനിടെ നടന്ന പഞ്ചായത്ത് തിരഞ്ഞെടുപ്പിലും അസ്‌ന നാട്ടില്‍ വോട്ടു ചെയ്യാനെത്തിയിരുന്നു. ഇന്നലെ രാവിലെ 6.15 ഓടെ മാതാപിതാക്കളോടും സഹോദരനോടൊപ്പവും ക്യൂ നിന്നാണ് പൂവത്തൂര്‍ ന്യൂ എല്‍.പി സ്‌കൂളില്‍ അസ്‌ന വോട്ടു രേഖപ്പെടുത്തിയത്.ഇതിനായി തിങ്കളാഴ്ച രാത്രിയാണ് അസ്‌ന നാട്ടിലെത്തിയത്.ഇന്നലെ ഉച്ചയോടെ കോഴിക്കോട്ടേക്ക് തിരിച്ചു.ശനിയാഴ്ച മെഡിക്കല്‍ കോളജില്‍ നടക്കുന്ന ചടങ്ങില്‍ അസ്‌ന എം ബി.ബി.എസ് സര്‍ട്ടിഫിക്കറ്റ് ഏറ്റുവാങ്ങും.