ദുബയ്: ക്രിക്കറ്റില്‍ പിറകില്‍ നില്‍ക്കുന്ന കേരളം പോലെയുള്ളസംസ്ഥാനങ്ങളില്‍ നിന്ന് വരുന്ന ഓരോ താരങ്ങള്‍ക്കും മുന്‍ ഇന്ത്യന്‍ നായകന്‍ എം.എസ് ധോണി എന്നും പ്രചോദനമാണെന്ന് കേരളത്തിന്റെ ക്രിക്കറ്റ് താരം സഞ്ജു വി. സാംസണ്‍. ഐ.പി.എല്‍ ടൂര്‍ണമെന്റിനായി ദുബയിലെത്തിയ താരം, ഗള്‍ഫ് ന്യൂസിന് നല്‍കിയ അഭിമുഖത്തിനിടെയാണ് ധോണിയെ വാനോളം പുകഴ്ത്തിയത്.
ക്രിക്കറ്റിന് പെരുമ പോലും ലഭിക്കാത്ത റാഞ്ചി എന്ന വില്ലേജില്‍ നിന്ന് വന്ന് ലോക ക്രിക്കറ്റിനെ തന്നെ കീഴടക്കിയ താരമാണ് ധോണി. കരിയറിനിടെ മൂന്ന് അന്താരാഷ്ട്ര കിരീടങ്ങള്‍ അദ്ദേഹം എത്തിപ്പിടിക്കുകയും ചെയ്തു. അദ്ദേഹത്തെപ്പോലെ താനും ക്രിക്കറ്റില്‍ ഏറെ പ്രശസ്തി നേടിയിട്ടില്ലാത്ത സംസ്ഥാനത്ത് നിന്നാണ് അന്താരാഷ്ട്ര തലത്തിലേക്ക് കടന്നുവന്നത്. അന്ന് അദ്ദേഹത്തിന്റെ ക്രിക്കറ്റ് ജീവിതമാണ് തന്നെപ്പോലുള്ള താരങ്ങള്‍ക്ക് പ്രചോദനമായതെന്നും സഞ്ജു കൂട്ടിച്ചേര്‍ത്തു. ബംഗ്ലാദേശിനെതിരായ ആദ്യ അന്താരാഷ്ട്ര മത്സരം കളിച്ചതു മുതല്‍ ധോണിഭായ് ഞങ്ങള്‍ക്ക് ഒരു വഴികാട്ടിയായിരുന്നു. പിന്നീട് പാകിസ്താനെതിരേ ആദ്യ സെഞ്ചുറിയും നേടി.
ഞങ്ങളുടെ അതേ പശ്ചാത്തലത്തില്‍ വളര്‍ന്ന് ഇത്രയും ഉയരങ്ങള്‍ താണ്ടിയ ധോണി, ചെറിയ ഗ്രാമങ്ങളില്‍ നിന്ന് വളര്‍ന്നു വരുന്ന താരങ്ങള്‍ക്ക് വലിയൊരു പ്രചോദനമാണെന്നും സഞ്ജു പറഞ്ഞു. അഞ്ചു വര്‍ഷം മുന്‍പ് ദേശീയ ടീമിനായി അരങ്ങേറ്റം കുറിച്ച സഞ്ജു കഴിഞ്ഞ ജനുവരിയിലാണ് അവസാനമായി ഇന്ത്യന്‍ ജഴ്‌സി അണിഞ്ഞത്.