വടക്കാഞ്ചേരി: തെരഞ്ഞെടുപ്പിന്റെ അടുത്ത ദിവസം മുണ്ടൂരിനെ ഞെട്ടിച്ച് ഇരട്ട കൊലപാതകം. ക്രിമിനല്‍ സംഘങ്ങളുടെ വിഹാരത്തിന് മേഖലയില്‍ അയവുവന്നുവെന്ന് കരുതിയിരിക്കുമ്പോഴാണ് വീണ്ടും അക്രമവും കൊലപാതകവും നടന്നതെന്നത് നാടിനെ പരിഭ്രാന്തിയിലാഴ്ത്തുകയാണ്. ചൊവ്വല്ലൂര്‍ വീട്ടില്‍ ക്രിസ്റ്റഫര്‍, പറവട്ടാനി വീട്ടില്‍ ശ്യാം എന്നിവരാണ് കൊല്ലപ്പെട്ടത്.
ക്രിമിനല്‍ സംഘങ്ങളുടെ കുടിപ്പകയും കഞ്ചാവ് കച്ചവടവുമായി ബന്ധപ്പെട്ട വൈരാഗ്യവുമാണ് കൊലപാതകത്തിലേക്ക് നയിച്ചതെന്ന് പൊലിസ് പറയുന്നു.
വരടിയം, കുറ്റൂര്‍ മേഖലയില്‍ ക്രിമിനല്‍ സംഘങ്ങള്‍ തമ്മില്‍ ഏറ്റുമുട്ടല്‍ പതിവായിരുന്നു. പൊലിസ് കര്‍ശന ഇടപെടല്‍ നടത്തിയതിനെ തുടര്‍ന്ന് കുറച്ച് കാലമായി ഇത് ശമിച്ച നിലയിലുമായിരുന്നു. ഇന്നലെ പുലര്‍ച്ചെ നടന്ന ഇരട്ടക്കൊലപാതകം ഈ ആശ്വാസത്തെയെല്ലാം തകര്‍ക്കുന്നതായി.
കഴിഞ്ഞ കുറച്ച് ദിവസങ്ങളായി മേഖലയില്‍ കഞ്ചാവ് ലോബികള്‍ തമ്മില്‍ ചെറിയ തര്‍ക്കങ്ങള്‍ നിലനിന്നിരുന്നു. അത് വളര്‍ന്നാണ് ഇരട്ട കൊലയില്‍ കലാശിച്ചത്.
ഏതാനും ദിവസം മുന്‍പ് എക്‌സൈസ് സംഘം സിജോ എന്ന സംഘതലവന്റെ നേതൃത്വത്തിലുള്ളവരുടെ കൈയില്‍നിന്ന് കഞ്ചാവ് പിടികൂടിയിരുന്നു. ഇത് രാജേഷ് എന്ന മറ്റൊരു സംഘത്തിന്റെ ഒറ്റിനെ തുടര്‍ന്നാണെന്ന വിലയിരുത്തലുണ്ടായിരുന്നു. മരണമടഞ്ഞ യുവാക്കള്‍ രാജേഷിന്റെ സംഘാംഗങ്ങളാണ്.
കൊലപാതകം നടന്ന സ്ഥലത്ത് നിന്ന് കൊലപാതകത്തിന് ഉപയോഗിച്ച വടിവാള്‍ കണ്ടെടുത്തു.
തകര്‍ന്ന ഹെല്‍മറ്റും , പൊട്ടാത്ത നാടന്‍ ബോംബും കണ്ടെത്തി. ആക്രമണം നടന്ന സ്ഥലത്തെ കാഞ്ഞിരപറമ്പില്‍ സണ്ണി എന്നയാളുടെ വീട്ടില്‍ സ്ഥാപിച്ചിരുന്ന സി.സി.ടി.വിയില്‍നിന്ന് വ്യക്തമായ തെളിവ് പൊലിസിന് ലഭിച്ചിട്ടുണ്ട്.  പ്രതികളെ ഉടന്‍ പിടികൂടുമെന്ന് പൊലിസ് കമ്മിഷണര്‍ യതീഷ് ചന്ദ്ര പറഞ്ഞു.