ബാലുശ്ശേരി: ടൗണില്‍ കൂട്ടിയിട്ട മാലിന്യച്ചാക്കുകള്‍ നീക്കം ചെയ്യാത്തതില്‍ വ്യാപാരികളും യാത്രക്കാരും ദുരിതത്തില്‍. റോഡിന്റെ ഓവുചാലുകളില്‍ നിന്നും പുറത്തെടുത്ത മാലിന്യങ്ങളാണ് ടൗണിന്റെ പല ഭാഗങ്ങളിലായി ചാക്കുകളിലാക്കി കൂട്ടിയിട്ടിരിക്കുന്നത്. ഗതാഗതക്കുരുക്കിനാല്‍ വീര്‍പ്പുമുട്ടുന്ന ബാലുശ്ശേരിയില്‍ റോഡരികിലെ മാലിന്യച്ചാക്കുകള്‍ നീക്കം ചെയ്യാത്തതില്‍ വ്യാപാരികള്‍ പ്രതിഷേധിച്ചു. ബസ് സ്റ്റാന്‍ഡ് നവീകരണം പൂര്‍ത്തീകരിക്കാത്തതിനാല്‍ ഇപ്പോള്‍ ബസുകള്‍ റോഡരികില്‍ നിര്‍ത്തിയാണ് യാത്രക്കാരെ കയറ്റുന്നതും ഇറക്കുന്നതും. ഇതിനിടയിലാണ് മാലിന്യച്ചാക്കുകള്‍ നിക്ഷേപിച്ചിരിക്കുന്നത്. ബസുകള്‍ മാലിന്യച്ചാക്കുകള്‍ക്കു മുകളിലൂടെ കയറിയിറങ്ങി ഇവ റോഡില്‍ ചിതറികിടക്കുന്നതിനാല്‍ യാത്രക്കാര്‍ ഏറെ പ്രയാസപ്പെടുന്നു.