അരീക്കോട്: ഉരുള്‍പൊട്ടല്‍ ഭീഷണി നിലനില്‍ക്കുന്ന ഓടക്കയത്തെ വിവിധ കോളനികളില്‍ നിന്ന് മാറിത്താമസിക്കാനുള്ള അധികൃതരുടെ നിര്‍ദേശം തള്ളിക്കളഞ്ഞ് ആദിവാസികള്‍. ഇന്നലെ ഓടക്കയം റബര്‍ ഉല്‍പാദക സംഘത്തിന്റെ കെട്ടിടത്തില്‍ ചേര്‍ന്ന ഊരുകൂട്ടത്തിലാണ് കാട് വിട്ടു പോവാന്‍ തയാറല്ലെന്ന് ആദിവാസികള്‍ വ്യക്തമാക്കിയത്. കുരീരി, നെല്ലിയായി, കൊടുമ്പുഴ, ഈന്തുംപാലി, പന്നിയാര്‍മല, ആലാപ്പാറ, പണിയ കോളനി, കൂരങ്കല്ല്, കളകപ്പാറ, മൈലാടി തുടങ്ങിയ ആദിവാസി കോളനികളിലുള്ളവരുടെ ഊരുകൂട്ടമാണ് ഇന്നലെ ചേര്‍ന്നത്.
അപകട ഭീഷണി നേരിടുന്ന മേഖലകളിലുള്ളവരെ മാറ്റിത്താമസിപ്പിക്കാനുള്ള ജില്ലാ കലക്ടറുടെ നിര്‍ദേശം ആദിവാസികളെ ബോധ്യപ്പെടുത്താനായിരുന്നു ഈരുകൂട്ടം വിളിച്ചു ചേര്‍ത്തതെങ്കിലും അധികൃതരുടെ നിര്‍ദേശം പ്രായോഗികമല്ലെന്ന നിലപാടിലായിരുന്നു ആദിവാസികള്‍. ഉരുള്‍പൊട്ടലിന് സാധ്യതയുള്ള കോളനികളില്‍ നിന്ന് മാറിത്താമസിക്കാന്‍ തയാറാണെങ്കില്‍ സര്‍ക്കാര്‍ നിശ്ചയിക്കുന്ന സ്ഥലങ്ങളില്‍ താമസ സൗകര്യം ഒരുക്കാമെന്ന് ഊരുക്കൂട്ടത്തിനെത്തിയ വാര്‍ഡ് അംഗം സുനിതാ മനോജും ട്രൈബല്‍ ഓഫീസര്‍ ഗോപകുമാറും ആദിവാസികളെ അറിയിച്ചു. എന്നാല്‍ ഭൂമിയും കൃഷിയിടവും വിട്ട് എവിടേക്കും പോകാന്‍ തയാറല്ലെന്ന നിലപാടിലാണ് ആദിവാസികള്‍. ചുരുക്കം ആളുകള്‍ മാത്രമാണ് മാറിത്താമസിക്കാന്‍ സന്നദ്ധത അറിയിച്ചത്. എന്നാല്‍ തങ്ങളെ പൂര്‍ണമായും കാടുകളില്‍ നിന്ന് ഇറക്കിക്കൊണ്ടു പോകരുതെന്നും അപകട ഘട്ടങ്ങളില്‍ മാത്രം മാറിത്താമസിക്കാന്‍ പ്രത്യേക കേന്ദ്രം തുടങ്ങണമെന്നും ആദിവാസികള്‍ ആവശ്യപെട്ടു.
ഓടക്കയത്ത് വീണ്ടും ഉരുള്‍പൊട്ടലിന് സാധ്യതയുണ്ടെന്ന് ജില്ലാ ജിയോളജിസ്റ്റിന്റെ നേതൃത്വത്തില്‍ നടത്തിയ പ്രാഥമിക പരിശോധനയില്‍ വ്യക്തമാക്കിയിരുന്നു. ഇതേ തുടര്‍ന്നാണ് ആദിവാസികളെ മാറ്റിത്താമസിപ്പിക്കാനുള്ള ശ്രമം ആരംഭിച്ചത്. എന്നാല്‍ തിരിച്ചു വരുമ്പോഴേക്കും തങ്ങളുടെ വീടും ഭൂമിയും കൃഷിയിടവും നഷ്ടപ്പെടുമെന്ന ഭീതിയിലാണിവര്‍. ഊരുക്കൂട്ടത്തിന് വാര്‍ഡ് അംഗം സുനിതാ മനോജ്, ട്രൈബല്‍ ഓഫീസര്‍ ഗോപകുമാര്‍, ഊരുമൂപ്പന്‍ എന്‍.സി ഗോപാലന്‍ നേതൃത്വം നല്‍കി.