എരുമേലി: പ്രളയഭൂമിയില്‍നിന്ന് പറന്നുയര്‍ന്ന രജനിക്ക് ആണ്‍കുഞ്ഞ് പിറന്നു. മഹാപ്രളയത്തില്‍ ഒറ്റപ്പെട്ട എയ്ഞ്ചല്‍വാലിയില്‍നിന്ന് ഹെലികോപ്റ്ററില്‍ രക്ഷപ്പെടുത്തി ആശുപത്രിയിലെത്തിച്ച പൂര്‍ണഗര്‍ഭിണിയായ ആറാട്ടുകയം മുത്തുമണ്ണില്‍ വീട്ടില്‍ എം.ആര്‍ രജനിയാണ് കോട്ടയം മെഡിക്കല്‍ കോളജ് ആശുപത്രിയില്‍ കഴിഞ്ഞ ദിവസം ആണ്‍കുഞ്ഞിന് ജന്മം നല്‍കിയത്.
പമ്പയാറ് കരകവിഞ്ഞതോടെ പാലങ്ങളും റോഡുകളും വെള്ളത്തില്‍ മൂടി. ഇതോടെ തീര്‍ത്തും ഒറ്റപ്പെട്ട എയ്ഞ്ചല്‍വാലിയില്‍നിന്ന് ഹെലികോപ്റ്ററില്‍ രജനിയെ രക്ഷപ്പെടുത്തുകയായിരുന്നു. വെളിച്ചവും ഭക്ഷണവുമില്ലാതെ ഭീതിയോടെയാണ് എയ്ഞ്ചല്‍വാലി നിവാസികള്‍ ദിവസങ്ങള്‍ കഴിച്ചുകൂട്ടിയത്.
കാഞ്ഞിരപ്പള്ളിയിലെ സ്വകാര്യ ആശുപത്രിയിലും പിന്നീട് കോട്ടയം മെഡിക്കല്‍ കോളജ് ആശുപത്രിയിലും പ്രവേശിപ്പിച്ച രജനി കഴിഞ്ഞ ദിവസം ആണ്‍കുഞ്ഞിന് ജന്മം നല്‍കുകയായിരുന്നു. റാന്നി സ്വദേശിയായ അനീഷിന്റെ ഭാര്യയാണ്. പ്രസവവുമായി ബന്ധപ്പെട്ടാണ് രജനി എയ്ഞ്ചല്‍വാലിയിലെ സ്വന്തം വീട്ടില്‍ എത്തിയിരുന്നത്.