ന്യൂഡല്‍ഹി: കൊവിഡ് വ്യാപനം കാരണം രാജ്യത്തു പ്രഖ്യാപിച്ച ലോക്ക്ഡൗണ്‍ അശാസ്ത്രീയമായിരുന്നെന്നും അതുകൊണ്ട് രാജ്യത്തിനു വലിയ നഷ്ടമുണ്ടായെന്നും ആവര്‍ത്തിച്ച് കോണ്‍ഗ്രസ് നേതാവ് രാഹുല്‍ ഗാന്ധി. മുന്നറിയിപ്പില്ലാതെ രാജ്യമൊട്ടാകെ പ്രഖ്യാപിച്ച ലോക്ക്ഡൗണ്‍ ദുരന്തമായി മാറിയെന്ന് അദ്ദേഹം ആരോപിച്ചു.
21 ദിവസംകൊണ്ട് കൊറോണ പോകുമെന്നായിരുന്നു ലോക്ക്ഡൗണ്‍ പ്രഖ്യാപിക്കുമ്പോള്‍ പ്രധാനമന്ത്രി നരേന്ദ്രമോദി രാജ്യത്തിനു നല്‍കിയ വാഗ്ദാനമെന്നും എന്നാല്‍, കൊറോണയ്ക്കു പകരം ജനങ്ങളുടെ ജോലിയാണ് പോയതെന്നും രാഹുല്‍ പരിഹസിച്ചു. ചെറുകിട, ഇടത്തരം കച്ചവടക്കാരും ദിവസക്കൂലിക്കാരും തകര്‍ന്നെന്നും ഇന്ത്യയുടെ ജി.ഡി.പി കൂപ്പുകുത്തിയെന്നും രാഹുല്‍ ആരോപിച്ചു. ചെറുകിട, ഇടത്തരം മേഖലയ്ക്കു സഹായങ്ങള്‍ നല്‍ണമെന്നു പ്രതിപക്ഷം പലവട്ടം ആവശ്യപ്പെട്ടിട്ടും സര്‍ക്കാര്‍ ഗൗനിച്ചില്ല. ഇന്ത്യയുടെ സാമ്പത്തിക മേഖലയുടെ തകര്‍ച്ച ചൂണ്ടിക്കാട്ടിയ പ്രതിപക്ഷ നേതാക്കളെ സര്‍ക്കാര്‍ പരിഹസിച്ചു തള്ളി. ആസൂത്രണമില്ലാതെ പ്രഖ്യാപിച്ച ലോക്ക്ഡൗണ്‍ കൊറോണയ്‌ക്കെതിരായ ആക്രമണമായിരുന്നില്ലെന്നും ഇന്ത്യയിലെ ജനങ്ങളാണ് ലക്ഷ്യമാക്കപ്പെട്ടതെന്നും അദ്ദേഹം പറഞ്ഞു.