മുബൈ: മഹാരാഷ്ട്രയില്‍ മാവോയിസ്റ്റ് ആക്രമണത്തില്‍ 16 പേര്‍ കൊല്ലപ്പെട്ടു. ഗട്ചിറോളിയിലുണ്ടായ കുഴിബോംബ് സ്‌ഫോടനത്തിലാണ് കുര്‍കേഡ പൊലിസ് സ്റ്റേഷനിലെ 15 പൊലിസുകാരും വാഹനത്തിന്റെ ഡ്രൈവറും കൊല്ലപ്പെട്ടത്. തെരഞ്ഞെടുപ്പ് ഡ്യൂട്ടി കഴിഞ്ഞ് മടങ്ങുകയായിരുന്ന ഇവര്‍ക്കെതിരേ ബുധനാഴ്ച വൈകിട്ടാണ് ആക്രമണമുണ്ടായത്. സ്വകാര്യ വാഹനത്തിലാണ് ഇവര്‍ സഞ്ചരിച്ചിരുന്നത്. ഏത് സാഹചര്യത്തിലാണ് ഇവര്‍ സ്വകാര്യ വാഹനത്തില്‍ സഞ്ചരിച്ചതെന്ന് അന്വേഷിക്കുമെന്ന് മഹാരാഷ്ട്ര ഡി.ജി.പി പറഞ്ഞു. കഴിഞ്ഞ ദിവസം രാവിലെ ഗട്ചിറോളിയിലെ ജംബൂപാട ഗ്രാമത്തില്‍ 25 വാഹനങ്ങള്‍ മാവേയിസ്റ്റുകള്‍ കഴിഞ്ഞ ദിവസം നശിപ്പിച്ചിരുന്നു. ഇതിനു പിന്നാലെയാണ് കുഴിബോംബ് സ്‌ഫോടനമുണ്ടായിരിക്കുന്നത്. സംഭവത്തില്‍ പ്രധാനമന്ത്രി നരേന്ദ്രമോദി അപലപിച്ചു. മഹാരാഷ്ട്രയിലെ ഗട്ചിറോളിയിലുണ്ടായ ദാരുണമായ ആക്രമണത്തെ അപലപിക്കുകയാണെന്നും വീരമൃത്യുവരിച്ച ധീരരെ സല്യൂട്ട് ചെയ്യുകയാണെന്നും അവരുടെ ജീവത്യാഗം മറക്കില്ലെന്നും മോദി പറഞ്ഞു. മഹാരാഷ്ട്ര സംസ്ഥാനത്തിന്റെ സ്ഥാപക ദിനം ആഘോഷിക്കുന്നതിനിടെയാണ് ആക്രമണമുണ്ടായത്. കഴിഞ്ഞ വര്‍ഷം ഏപ്രില്‍ 22ന് 40 മാവോയിസ്റ്റുകളെ വധിച്ചതിന്റെ പ്രതികാരമുണ്ടാവുമെന്ന് നേരത്തെ മുന്നറിയിപ്പുണ്ടായിരുന്നു.

ദന്തോവാഡ ആക്രമണത്തിന്റെ
സൂത്രധാരനെ കൊലപ്പെടുത്തി

റായ്പൂര്‍: തലയ്ക്ക് എട്ടുലക്ഷം രൂപ വിലയിട്ട മാവോയിസ്റ്റ് നേതാവും ദന്തേവാഡ മാവോയിസ്റ്റ് ആക്രമണത്തിന്റെ സൂത്രധാരനുമായ മാധ്വി മുയ്യ(29)യെ സുരക്ഷാസേന ഏറ്റുമുട്ടലില്‍ വധിച്ചു. കഴിഞ്ഞ ദിവസം രാവിലെ ദന്തേവാഡയിലെ പെര്‍പ്പ വനപ്രദേശത്ത് നടന്ന ഏറ്റുമുട്ടലിലാണ് മാധ്വി മുയ്യയെ വധിച്ചത്.

റായ്പുരില്‍നിന്ന് ഏകദേശം 450 കി.മീ. അകലെയുള്ള വനപ്രദേശത്ത് സുരക്ഷാസേന പരിശോധന നടത്തുന്നതിനിടെ സേനാംഗങ്ങള്‍ക്ക് നേരെ വെടിവെപ്പുണ്ടായെന്നും തുടര്‍ന്ന് ഏറ്റുമുട്ടലുണ്ടായെന്നും ഛത്തീസ്ഗഢ് പൊലിസ് ഡയരക്ടര്‍ ജനറല്‍ ഗിര്‍ദാരി നായക് പറഞ്ഞു.

കഴിഞ്ഞ മാസം ബി.ജെ.പി. എം.എല്‍.എ ഭീമാ മാണ്ഡവി ഉള്‍പ്പെടെ അഞ്ചുപേരെ കൊലപ്പെടുത്തിയ സംഭവത്തിലെ മുഖ്യസൂത്രധാരനായിരുന്നു മാധ്വി മുയ്യ. പൊതുപരിപാടിയില്‍ പങ്കെടുക്കാന്‍ പോകുന്നതിനിടെയാണ് ബി.ജെ.പി. എം.എല്‍.എക്കെതിരെ മാവോവാദികള്‍ ആക്രമണം നടത്തിയത്.