സ്വന്തം ലേഖകന്‍
വെഞ്ഞാറമൂട്: ഇരട്ടക്കൊലക്കേസിലെ പ്രധാന പ്രതികളെ ഗൂഢാലോചന നടത്തിയ സ്ഥലങ്ങളില്‍ തെളിവെടുപ്പിന് എത്തിച്ചു. പ്രതികളായ അന്‍സര്‍, അജിത്ത്, നജീബ് എന്നിവരെയാണ് തെളിവെടുപ്പിന് കൊണ്ടുവന്നത്.
പ്രതികള്‍ ഗൂഢാലോചന നടത്തിയ മുത്തികാവിലെ റബ്ബര്‍ എസ്റ്റേറ്റിലും ഒരുമിച്ചു കൂടിയ മാങ്കുഴിയിലും പെട്രോള്‍ വാങ്ങിയ സ്ഥലമായ മാമ്മൂട്ടിലും മരുതുംമൂട് ജങ്ഷനിലും ഇന്നലെ തെളിവെടുപ്പ് നടത്തി.
കൊലപാതകം നടക്കുന്ന ദിവസം രാവിലെ പ്രതികള്‍ മുത്തിക്കാവിലെ ഫാം ഹൗസിനു സമീപത്തെ റബ്ബര്‍ തോട്ടത്തില്‍ ഒരുമിച്ചു കൂടി മദ്യപിച്ചിരുന്നു. ഇവിടെ നിന്ന് മദ്യക്കുപ്പികള്‍ കണ്ടെടുത്തു. തുടര്‍ന്ന് രാത്രിയില്‍ ഇരട്ട കൊലപാതകത്തിനു ശേഷം പ്രതികളായ സജീവ്, സനല്‍ എന്നിവര്‍ വന്ന ബൈക്ക് സംഭവ സ്ഥലത്തു ഉപേക്ഷിച്ച ശേഷം മറ്റൊരു ഇരുചക്ര വാഹനത്തില്‍ സജീവ്, സനല്‍, ഉണ്ണി എന്നിവര്‍ രക്ഷപ്പെടുന്നതിനിടയില്‍ വേങ്കമല ക്ഷേത്രത്തിനു സമീപം മാങ്കുഴിയില്‍ വച്ച് വാഹനത്തിലെ പെട്രോള്‍ തീര്‍ന്നു നിന്നു.
ഇവിടെവച്ച് പ്രതികള്‍ നജീബിനെ ഫോണ്‍ വിളിച്ചു സംഭവം പറയുകയും പെട്രോള്‍ വാങ്ങി വരണമെന്ന് ആവശ്യപ്പെടുകയും ചെയ്തു. ഇതനുസരിച്ചു നജീബ് മരുതുംമൂട് ജങ്ഷനില്‍ താമസിക്കുന്ന പെട്രോള്‍ വില്‍പ്പന നടത്തുന്നയാളെ വിളിച്ചു അയാളില്‍നിന്നു പെട്രോള്‍ വാങ്ങി സജീവിനും കൂട്ടാളികള്‍ക്കും എത്തിച്ചു കൊടുത്തിരുന്നു.
ഇവിടെയും എത്തിച്ചു പ്രതികളെ തെളിവെടുപ്പ് നടത്തി. ആറ്റിങ്ങല്‍ ഡിവൈ.എസ്.പി എസ്.വൈ സുരേഷ് കുമാര്‍, വെഞ്ഞാറമൂട് സി.ഐ വിജയരാഘവന്‍ എന്നിവരുടെ നേതൃത്വത്തില്‍ വന്‍ പൊലിസ് സുരക്ഷയിലാണ് തെളിവെടുപ്പ് നടത്തിയത്.